ވޯލްޑް ކަޕް ފުޓްބޯޅަ މުބާރާތުގައި ހޯމަ ދުވަހު ކުޅުނު މެޗުގައި އުރުދުންއާ ބައްދަލުކޮށް 2-1 އިން މޮޅުވެ، މުބާރާތުގެ ނޮކްއައުޓް ބުރަށް ދިއުމުގެ އުންމީދު އަލްޖީރިއާއިން އާކޮށްފިއެވެ. މިއީ 2014 ވަނަ އަހަރުގެ ފަހުން ވޯލްޑް ކަޕްގައި އަލްޖީރިއާއިން ހޯދި ފުރަތަމަ މޮޅެވެ.

މި މެޗުގެ ފުރަތަމަ ހާފުގައި ނިޒާރު އަލް ރާޝްދާން ޖެހި ލަނޑާއެކު އުރުދުންއިން ވަނީ ލީޑު ނަގާފައެވެ. މިއީ ވޯލްޑް ކަޕްގެ ތާރީޚުގައި އުރުދުންއިން ލީޑު ނެގި ފުރަތަމަ ފަހަރެވެ. ނަމަވެސް ދެވަނަ ހާފުގައި އަލްޖީރިއާއިން ވަނީ ކުޅުން ރަނގަޅުކޮށް ދެ ކޯނަރަކުން ދެ ލަނޑު ޖަހައި މެޗުގެ ނަތީޖާ އަނބުރާލާފައެވެ.

Ad
rt

އަލްޖީރިއާއަށް ނަތީޖާ ހަމަހަމަކޮށްދިނީ 69 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ނަދީރު ބެންބުއާލީއެވެ. ރިޔާދު މަހްރޭޒް ނަގައިދިން ކޯނަރަކުން އޭނާ މި ލަނޑު ކާމިޔާބުކުރީ ބޮލުންނެވެ. އަދި މެޗުން މޮޅުވި ލަނޑު 82 ވަނަ މިނެޓުގައި ކާމިޔާބުކޮށްދިނީ އަމީން ގުއީރީއެވެ.

މިއީ ވޯލްޑް ކަޕްގެ ތާރީޚުގައި ފުރަތަމަ ލަނޑު ޖަހާފައިވަނިކޮށް ފަހަތުން އަރައި އަލްޖީރިއާ މޮޅުވި ފުރަތަމަ ފަހަރެވެ. މީގެ ކުރިން މިފަދަ ހާލަތްތަކުގައި އެޓީމު ވަނީ ހަތް މެޗުން ބަލިވެ، ދެ މެޗުން އެއްވަރުވެފައެވެ.

"މި މެޗުން މޮޅުވާން އަހަރެމެން ހައްގު،މި މޮޅާއެކު ކުރިއަށް އޮތް މެޗަށް ވަރަށް ބޮޑު އިތުބާރެއް ލިބިއްޖެ." މެޗަށްފަހު ވާހަކަ ދައްކަމުން އަލްޖީރިއާގެ ކޯޗު ލަޑީމިއާ ޕެޓްކޮވިޗް ބުންޏެވެ.

މި ނަތީޖާއާއެކު އުރުދުން ވަނީ މުބާރާތުން ކަޓާފައެވެ. ފުރަތަމަ މެޗުގައި އޮސްޓްރިއާ އަތުން 3-1 އިން ބަލިވި އުރުދުންއަށް މިއީ ޖެހިޖެހިގެން ލިބުނު ދެވަނަ ބަލިވުމެވެ. އުރުދުންގެ ކޯޗު ޖަމާލް ސައްލާމީ ބުނީ ކުޅުންތެރިންގެ ފަރާތުން ފެނުނު ކުޅުމާ މެދު ފަޚުރުވެރިވާ ކަމަށާއި، ނަތީޖާއާ މެދު ދެރަވާ ކަމަށެވެ.

ގްރޫޕް ޖޭ ގައި ހިމެނޭ އަލްޖީރިއާއަށް މިހާރު ވަނީ ނޮކްއައުޓް ބުރަށް ދިއުމުގެ ފުރުސަތު އަމިއްލަ ބާރުގައި ލިބިފައެވެ. އަންނަ ހޮނިހިރު ދުވަހު އޮސްޓްރިއާއާ ދެކޮޅަށް ކުޅޭ މެޗުން މޮޅުވެއްޖެ ނަމަ، އެޓީމަށް ގްރޫޕްގެ ދެވަނަ ކަށަވަރުވާނެއެވެ.

މެޗަށްފަހު ވާހަކަ ދައްކަމުން އަލްޖީރިއާގެ މިޑްފީލްޑަރު އިބްރާހިމް މާޒާ ބުނީ އެންމެ މުހިންމު ކަމަކީ ތިން ޕޮއިންޓް ލިބުން ކަމަށާއި، ދެން އޮތް މެޗުގައި މިއަށްވުރެ ބޮޑަށް ހަނގުރާމަކުރާނެ ކަމަށެވެ.