ވޯލްޑް ކަޕްގައި ބެލްޖިއަމްއާ ދެކޮޅަށް ކުޅުނު މެޗު އެއްވަރުކޮށް، އީރާނުން މުހިންމު ނަތީޖާއެއް ހޯދައިފިއެވެ.

މެޗުގެ ފަހުބައި ބެލްޖިއަމްއިން 10 ކުޅުންތެރިންނާއެކު ކުޅުނުއިރު، އީރާނުން ވަނީ ދަނޑުމަތީގައި ދެއްކި ހިތްވަރާއެކު މެޗު އެއްވަރުކޮށްފައެވެ.

Ad
rt

ބެލްޖިއަމްގެ ޓީމަށް މިހާރު ވަނީ ވޯލްޑް ކަޕްގައި ގޯލެއް ނުޖެހޭތާ 1,306 ދުވަސް ވެފައެވެ. އެންމެ ފަހުން އެ ޓީމުގެ ކުޅުންތެރިއަކު ވޯލްޑް ކަޕެއްގައި ލަނޑެއް ޖަހާފައިވަނީ 2022 ވަނަ އަހަރުގެ މުބާރާތުގެ ފުރަތަމަ މެޗުގައެވެ. އެންޖަރީގެ ސަބަބުން ޖެރެމީ ޑޯކޫ ނުކުޅޭ މި މެޗުގައި ބެލްޖިއަމްގެ އެޓޭކް ފެނުނީ ވަރަށް ބަލިކަށިކޮށެވެ.

މެޗުގެ ފަހު 24 މިނެޓުގައި ބެލްޖިއަމްގެ ޑިފެންޑަރު ނޭތަން އެންގޯއީ އަށް ވަނީ ރަތް ކާޑު ދައްކާފައެވެ. އޭނާ އަށް ރަތް ކާޑު ދެއްކީ އީރާނުގެ ކެޕްޓަން މެހްދީ ތަރޭމީ ގޯލަށް ނުރައްކާ ކުރަން ދަނިކޮށް ފަހަތުން ހިފަހައްޓައި ހުރަސް އެޅުމުންނެވެ.

މެޗުގައި އީރާނުން ގޯލެއް ޖެހިއެވެ. ނަމަވެސް ރެފްރީ ވީއާރު ޗެކް ކުރުމަށްފަހު އެއީ އޮފްސައިޑް ލަނޑެއްކަމަށް ވަނީ ނިންމާފައެވެ. މި މެޗުގައި އީރާނުގެ ގޯލް ކީޕަރު ވަނީ ފާހަގަކޮށްލެވޭ މޮޅު ކުޅުމެއް ދައްކާފައެވެ.

މި މުބާރާތުގައި އީރާނަށް ވަނީ ދަނޑުން ބޭރުގައި ގިނަ ގޮންޖެހުންތަކެއް ކުރިމަތިވެފައެވެ. އެމެރިކާގެ ކަމާބެހޭ ފަރާތްތަކުން އެ ގައުމަށް އެތެރެވުމުގެ ހުއްދަ ދިނީ މެޗުގެ އެންމެ ދެ ދުވަސް ކުރިންނެވެ. މީގެ އިތުރުން ގައުމީ ސަލާމް ކުޅުނު ވަގުތު ދަނޑުގެ ބޮޑު ބަޔަކުން ވަނީ އީރާނާ ދެކޮޅަށް އަޑުގަދަކޮށްފައެވެ. އީރާނުން އަމިއްލަ ނަފްސު ސިފަކުރަނީ މި މުބާރާތުގައި އޮތް "އެންމެ ބޮޑަށް އަނިޔާ ލިބިފައިވާ" ގައުމުގެ ގޮތުގައެވެ.

މިއީ ވޯލްޑް ކަޕެއްގެ ފުރަތަމަ ދެ މެޗުން ބަލިނުވެ އީރާނުން ނިންމާލި ފުރަތަމަ ފަހަރެވެ. ދެ ޕޮއިންޓާއެކު އީރާނަށް އަދިވެސް ދެވަނަ ބުރަށް ދިއުމުގެ ފުރުސަތު އެބައޮތެވެ. އެ ޓީމުގެ ކުރިއަށް އޮތް މެޗުގައި އަންނަ ހުކުރު ދުވަހު ސިއެޓްލްގައި ބައްދަލުކުރާނީ މިސްރާއެވެ. ބެލްޖިއަމް އަށް ވެސް އަދި ފުރުސަތު އޮތް ނަމަވެސް، ކުރިއަށް ދިއުމަށްޓަކައި އެ ޓީމުގެ ކުޅުން ވަރަށް ބޮޑަށް ރަނގަޅު ކުރަން ޖެހެއެވެ.