ސުވިޑަންގެ މުސްލިމް ތަރި ޔާސީން އަޔާރީ ކާމިޔާބުކުރި ދެ ލަނޑާއެކު، 2026 ގެ ވޯލްޑް ކަޕަށް އެ ގައުމަކީ ކުފޫހަމަވާ ގައުމެއްކަން ސުވިޑަންއިން ސާބިތުކޮށްދީފިއެވެ.

އާދީއްތަ ދުވަހުގެ ރޭ 5-1 އިން ޓިއުނީޝިއާ ބަލިކޮށް، އެޓީމު މިހާރު އޮތީ ގްރޫޕް އެފްގެ އެއްވަނައިގައެވެ.

Ad
rt

އަލެކްސެންޑަރ އިސާކް އަދި ވިކްޓަރ ގިޔޮކެރޭސް ކުރެ ކޮންމެ ކުޅުންތެރިއަކު ލަނޑެއް ޖަހައި އެސިސްޓެއް ހެދިއިރު، މަޓިއަސް ސުވަންބާގް ވެސް ވަނީ ސުވިޑަންއަށް ލަނޑެއް ކާމިޔާބުކޮށްދީފައެވެ. ދުނިޔޭގެ ރޭންކިންގެ 39 ވަނައިގައި އޮތް ސުވިޑަންއަށް 2022 ގެ ވޯލްޑް ކަޕުން ފުރުސަތު ގެއްލުނު ނަމަވެސް، އޭގެ އަށް އަހަރު ކުރިން ރަޝިއާގައި ބޭއްވި ވޯލްޑް ކަޕްގެ ކުއާޓާ ފައިނަލާ ހަމައަށް އެޓީމު ދަތުރުކުރިއެވެ.

ދުނިޔޭގެ ރޭންކިންގެ 45 ވަނައިގައި އޮތް ޓިއުނީޝިއާއަށް ހަމައެކަނި ލަނޑު ކާމިޔާބުކޮށްދިނީ އުމަރު ރެކީކްއެވެ. މިއީ ޓިއުނީޝިއާ ވާދަކުރާ ހަތްވަނަ ވޯލްޑް ކަޕް ކަމަށްވީ ނަމަވެސް، އެޓީމަށް އަދި ދުވަހަކުވެސް ގްރޫޕް ސްޓޭޖުން ކުރިއަށް ދެވިފައެއް ނުވެއެވެ.

އެސްޓާޑިއޯ ބީބީވީއޭގައި ކުޅުނު މި މެޗުގެ ހަތްވަނަ މިނެޓާއި ދެވަނަ ހާފުގެ އިތުރު ވަގުތުގައި ދުރުން ފޮނުވާލި ހަމަލާތަކަކުން ސުވިޑަންގެ ފުރަތަމަ އަދި ފަހު ލަނޑު ޖަހައިދިނީ އަޔާރީއެވެ. އޭނާގެ ބައްޕަ އުފަންވި ގައުމަށް ކުރާ އިހުތިރާމެއްގެ ގޮތުން، ފުރަތަމަ ލަނޑަށްފަހު އޭނާ މާ ބޮޑަށް އުފާފާޅެއް ނުކުރެއެވެ.

މެޗުގެ 30 ވަނަ މިނެޓުގައި އިސާކް އޭނާގެ 18 ވަނަ ބައިނަލްއަގުވާމީ ލަނޑު ކާމިޔާބުކުރީ، ކައުންޓަރ އެޓޭކެއްގައި ގިޔޮކެރޭސް ތަނަވަސްކޮށްދިން ފުރުސަތަކުންނެވެ. ފައި ބިންދައިގެން ދިއުމުގެ ސަބަބުން މިދިޔަ ސީޒަނުގެ ބޮޑު ބައެއްގައި ކުޅުމާ ދުރުގައި ހުރި ލިވަޕޫލްގެ ފޯވާޑް އިސާކް، ބޯޅައާއެކު އެތެރެއަށް ވަދެ ފޮނުވާލި ހަމަލާ އަމާޒުވީ ޓިއުނީޝިއާގެ ކީޕަރު މުހިބް ޝަމާކްގެ އަތްދަށުން ގޯލުގެ ތެރެއަށެވެ.

އިސާކް ބުނި ގޮތުގައި އޭނާ އާއި ގިޔޮކެރޭސްގެ ކިބައިގައި ހުރީ ތަފާތު ހުނަރުތަކެއް ކަމަށާއި، އެއީ ޓީމަށް ލިބޭ ވަރަށް ބޮޑު ފައިދާއެކެވެ.

"އަހަރެމެންނަށް ތަފާތު ގޮތްގޮތަށް ހަމަލާތައް އުފެއްދިދާނެ،" އޭނާ އިތުރުކުރިއެވެ.

43 ވަނަ މިނެޓުގައި ރެކީކް ޖެހި ލަނޑާއެކު ސުވިޑަންގެ ބާރު ކުޑަވި ނަމަވެސް، އިސާކް އާއި ގިޔޮކެރޭސް އަލުން މެޗުގެ ކޮންޓްރޯލް ހޯދިއެވެ. އިސާކް ބޯޅަ ހޯދައި ގިޔޮކެރޭސްއަށް ދިން ފުރުސަތުގައި، އާސެނަލްގެ ފޯވާޑް ވަނީ ކީޕަރު ޝަމާކް ކައިރިން ނައްޓާލުމަށްފަހު ފަސޭހަކަމާއެކު ލަނޑު ޖަހާފައެވެ. މިއީ ސުވިޑަންއަށް އޭނާ ކުޅުނު ފަހު 15 މެޗުގައި ޖެހި 16 ވަނަ ލަނޑެވެ.

ސުވިޑަންގެ ކޯޗު ގްރަހަމް ޕޮޓާ ބުނި ގޮތުގައި އިސާކް އާއި ގިޔޮކެރޭސްގެ މެދުގައި އޮތީ ވަރަށް ވަރުގަދަ ގުޅުމެކެވެ.

"އެ ދެ ކުޅުންތެރިންގެ ފަހަތުގައި، ރަނގަޅަށް މަސައްކަތްކުރާ ޓީމެއް ބޭނުންވޭ. މިރޭ ކުޅުންތެރިން އެކަމުގައި ކުރިއެރުމެއް ހޯދީތީ އަހަރެން އުފާކުރަން،" ޕޮޓާ ބުންޏެވެ.
ސުވަންބާގް 84 ވަނަ މިނެޓުގައި ޖެހި ލަނޑު ގަބޫލުކުރީ ވީޑިއޯ ރިވިއު (ވިއޭއާރު) ބެލުމަށްފަހުއެވެ.

ސުވިޑަން ދެން ބައްދަލުކުރާނީ ހޮނިހިރު ދުވަހު ހިއުސްޓަންގައި ނެދަލޭންޑްސްއާއެވެ. ޓިއުނީޝިއާ މޮންޓެރޭގައި މަޑުކޮށް، ހަމަ އެ ދުވަހު ޖަޕާނާ ދެކޮޅަށް ނުކުންނާނެއެވެ.

މި ގްރޫޕްގައި ހިމެނޭ ރޭންކިންގެ ގޮތުން މަތީގައި އުޅޭ ނެދަލޭންޑްސް އާއި ޖަޕާން ބައްދަލުކުރި މެޗު، ޓެކްސަސްގެ އާލިންގްޓަންގައި ނިމުނީ 2-2 އިން އެއްވަރުވެގެންނެވެ.