މަސްތުވާތަކެތި ބޭނުންކޮށް، އޭގެ ވިޔަފާރިކުރުމާއި ޖުވާކުޅުން ފަދަ ގާނޫނާ ހިލާފު އަމަލުތަކެއް ހިންގާކަމުގެ ތުހުމަތުގައި ގިނަ އަދަދެއްގެ ބިދޭސީންތަކެއް ފުލުހުން ހައްޔަރުކޮށްފިއެވެ.
ދިވެހި ފުލުހުންގެ ޚިދުމަތުން ހާމަކޮށްފައިވާ ގޮތުގައި، މި މީހުން ހައްޔަރުކޮށްފައި ވަނީ ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި ހާއްސަ އޮޕަރޭޝަނެއްގައެވެ. 2026 އޭޕްރީލް 16 ވަނަ ދުވަހު ހިންގި މި އޮޕަރޭޝަނަކީ ފުލުހުންގެ އިންޓެލިޖެންސާއި ޑްރަގް އެންފޯސްމަންޓް ޑިޕާޓްމަންޓް ގުޅިގެން ކުރިއަށް ގެންދިޔަ ހަރަކާތެކެވެ.
މި މައްސަލައާ ގުޅިގެން ހައްޔަރުކޮށްފައި ވަނީ ބަންގްލަދޭޝް އަށް ނިސްބަތްވާ 38 ފިރިހެނުންނެވެ. މި މީހުންނަކީ މާލޭގެ ވަކި ސަރަހައްދެއްގައި ގަވާއިދާ ހިލާފަށް މަސްތުވާތަކެތީގެ މުއާމަލާތްތައް ހިންގައި، ފުޅާ ދާއިރާއެއްގައި ޖުވާކުޅުމުގެ އަމަލުތަކުގައި ބައިވެރިވަމުންދިޔަ ބައެއް ކަމަށް ފުލުހުން ތުހުމަތު ކުރެއެވެ.
ފުލުހުން ވިދާޅުވި ގޮތުގައި، މި މައްސަލައިގައި ހިފެހެއްޓި 38 ބިދޭސީންނަކީ ރާއްޖޭގެ އިމިގްރޭޝަން ގާނޫނާ ހިލާފަށް އުޅެމުންދާ ބައެއްކަން ފާހަގަކުރެވިފައިވާތީ، އެ މީހުން ރާއްޖެއިން ފޮނުވާލުމަށް (ޑީޕޯޓްކުރުމަށް) ޓަކައި މިހާރު ވަނީ މޯލްޑިވްސް އިމިގްރޭޝަނާ ހަވާލުކުރެވިފައެވެ.
މިފަދަ ގާނޫނާ ހިލާފު އަމަލުތައް ހިންގާ ފަރާތްތަކާ މެދު ފިޔަވަޅު އެޅުމަށް ސަރުކާރުގެ ކަމާބެހޭ އިދާރާތަކުން ދަނީ ވަރުގަދަ އޮޕަރޭޝަންތަކެއް ހިންގަމުންނެވެ. އެގޮތުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދުގެ ދަށުން، ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ހާއްސަ އިސްކަމެއް ދީގެން އަންނަނީ މަސައްކަތް ކުރަމުންނެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!