ބުރުކީނާ ފާސޯގެ އަސްކަރީ ސަރުކާރުން ސިޔާސީ ޕާޓީތައް އުވާލައިފި

ބުރުކީނާ ފާސޯގެ އަސްކަރީ ސަރުކާރުން އެ ގައުމުގެ ހުރިހާ ސިޔާސީ ޕާޓީތަކެއް އުވާލައި، އެ ޕާޓީތައް ހިންގުމާ ގުޅޭ ގާނޫނީ އޮނިގަނޑު ބާތިލުކޮށްފިއެވެ.

މިކަން ހާމަކޮށްފައިވަނީ މިދިޔަ ބުރާސްފަތި ދުވަހު އެ ގައުމުގެ ވަޒީރުންގެ މަޖިލީހުން ފާސްކުރި ރިޔާސީ ގަރާރެއްގައެވެ.

ސެޕްޓެމްބަރު 2022 ގައި ބަޣާވާތަކުން ވެރިކަމަށް އައި އަސްކަރީ ވެރިންގެ މި ނިންމުމަކީ، ބަޣާވާތަށްފަހު ސިޔާސީ ހަރަކާތްތައް ހުއްޓުވާފައި އޮތް އޮތުން އިތުރަށް ވަރުގަދަކޮށް، ބާރުތައް ކޮންޓްރޯލް ކުރުމަށް އެޅި ފިޔަވަޅެކެވެ.

ބުރުކީނާ ފާސޯގެ އިންޓީރިއާ މިނިސްޓަރު އެމީލް ޒެރްބޯ ވިދާޅުވީ، މި ނިންމުމަކީ ގައުމުގެ މަލްޓި-ޕާޓީ ނިޒާމުގެ ތެރޭގައި އޮތް ކޮރަޕްޝަނާއި ނިޒާމީ މައްސަލަތަކަށްފަހު "ދައުލަތް އަލުން ބިނާކުރުމަށް" ކުރެވޭ މަސައްކަތުގެ ބައެއް ކަމަށެވެ. އޭނާ އިތުރަށް ވިދާޅުވި ގޮތުގައި، ސަރުކާރުން ކުރި ދިރާސާއަކުން ދައްކާގޮތުގައި ސިޔާސީ ޕާޓީތައް ގިނަވުމުގެ ސަބަބުން ގައުމުގައި ބައިބައިވުން އުފެދި، އިޖުތިމާއީ އެއްބައިވަންތަކަން ވަނީ ކުޑަވެފައެވެ.

ބަޣާވާތުގެ ކުރިން އެ ގައުމުގައި 100 އަށްވުރެ ގިނަ ސިޔާސީ ޕާޓީ ރަޖިސްޓްރީކޮށްފައި އޮތްއިރު، 2020 ވަނަ އަހަރުގެ އާންމު އިންތިޚާބަށްފަހު 15 ޕާޓީއަކުން މަޖިލީހުގައި ތަމްސީލުކުރިއެވެ.

މި ގަރާރުގެ ދަށުން ހުރިހާ ސިޔާސީ ޕާޓީތަކާއި ސިޔާސީ ޖަމާއަތްތައް އުވާލެވޭނެއެވެ. ވަޒީރުންގެ މަޖިލީހުގެ ޔައުމިއްޔާގައިވާ ގޮތުން، ޕާޓީތަކަށް ފައިސާ ދިނުމާއި އިދިކޮޅު ލީޑަރުގެ މަގާމާ ގުޅޭ ގާނޫނުތައް ބާތިލުކުރުމަށް މިހާރުގެ އިންތިގާލީ މަޖިލީހަށް ފޮނުވޭނެއެވެ. އަދި އުވާލެވޭ ޕާޓީތަކުގެ ހުރިހާ މުދަލެއް ދައުލަތަށް ނެގޭނެއެވެ.

ބުރުކީނާ ފާސޯއަކީ، އަވަށްޓެރި މާލީ އަދި ނައިޖަރ ފަދައިން، އަލްގައިދާ އަދި އިސްލާމިކް ސްޓޭޓާ ގުޅުންހުރި ހަނގުރާމަވެރި ގްރޫޕްތަކުގެ ނުރައްކާ އިންތިހާއަށް އޮތް ގައުމެކެވެ. ވޭތުވެދިޔަ ދިހަ އަހަރު ތެރޭގައި މި ހަމަނުޖެހުންތަކުގައި އެތައް ހާސް ބަޔަކު މަރުވެ، މިލިއަނުން މީހުން ވަނީ ގެދޮރު ދޫކޮށް ގޮސްފައެވެ.