ފަލަސްތީނުގެ ދައުލަތް ރަސްމީކޮށް ބަލައިގަންނަން އޮސްޓްރޭލިޔާއިން ނިންމި ނިންމުމާ ގުޅިގެން، އެމެރިކާގެ ރިޕަބްލިކަން ޕާޓީގެ މަޖިލިސް މެމްބަރުންގެ ގްރޫޕަކުން އެކަމާ ދެކޮޅަށް އޮސްޓްރޭލިޔާ އަށް ވަރުގަދަ އިންޒާރުތަކެއް ދީފައެވެ.
އެމެރިކާގެ ކޮންގްރެސްގެ 25 މެމްބަރުން ސޮއިކޮށްފައިވާ ސިޓީއެއްގައި، އޮސްޓްރޭލިޔާ، ފްރާންސް، ކެނެޑާ އަދި އިނގިރޭސިވިލާތަށް އަމާޒުކޮށް ބުނެފައިވަނީ، ފަލަސްތީނުގެ ދައުލަތް ގަބޫލުކުރުމަކީ ހަމާސް ބާރުވެރިކުރުވައި، އިސްރާއީލުގެ ސަލާމަތަށް ނުރައްކާވެ، ސުލްހަވެރި ޙައްލެއް ހޯދުމުގެ މަގު ބަންދުވާނެ ކަމެއް ކަމަށެވެ.
މި ސިޓީގައި އިތުރަށް ބަޔާންކޮށްފައިވާ ގޮތުގައި، މިފަދަ ނިންމުމަކީ އެމެރިކާގެ ދިގު މުއްދަތުގެ ސިޔާސަތާއި މަސްލަހަތުތަކާ ފުށުއަރާނެ ކަމެކެވެ. އަދި މިކަމުގެ ސަބަބުން އެކުވެރި ގައުމުތަކަށް އަދަބު ދިނުމުގެ ފިޔަވަޅުތަކެއް އަޅަން ޖެހިދާނެ ކަމުގެ އިންޒާރުވެސް ދީފައިވެއެވެ.
ސިޓީގައި ފާހަގަކޮށްފައިވާ އަނެއް ކަމަކީ، ފަލަސްތީނުގެ ދައުލަތް ގަބޫލުކުރުމަކީ އޮސްޓްރޭލިޔާގައި ޔަހޫދީންނާ ދެކޮޅު ޝުޢޫރުތައް އިތުރުވެ، އަނިޔާވެރިކަން އާލާވުމަށް މަގުފަހިވާނެ ކަމެކެވެ.
ހަމާސްގެ ހަނގުރާމައިގެ ކުށްތައް ފެންނަން އޮތްކަމަށާއި، އެ ޖަމާއަތާމެދު އިތުރު ފިޔަވަޅުތަކެއް އެޅުމުގެ ބަދަލުގައި، ދައުލަތެއްގެ ގޮތުގައި ފަލަސްތީނު ގަބޫލުކުރުމަކީ ހައިރާންވާންޖެހޭ ކަމެއް ކަމަށް މި ސިޓީގައި ވަނީ ބުނެފައެވެ.
އޮސްޓްރޭލިޔާގެ ބޮޑުވަޒީރު އެންތޯނީ އަލްބަނީސީ ވަނީ ނިއުޔޯކަށް ވަޑައިގެން އދ. ގެ އާންމު މަޖިލީހުގައި ބައިވެރިވެ، ފަލަސްތީނު ދައުލަތް ގަބޫލުކުރުމަށް ރާވާފައިވާކަން ކުރިން ވަނީ ހާމަކުރައްވާފައެވެ. އަދި އެމަނިކުފާނު ވަނީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް ބާއްވާ ރިސެޕްޝަނެއްގައި ބައިވެރިވެވަޑައިގަތުމަށްވެސް ހަމަޖައްސަވާފައެވެ.
މި މައްސަލައިގައި އޮސްޓްރޭލިޔާގެ ހަކަތައިގެ ވަޒީރު ކްރިސް ބޯވެން ވިދާޅުވެފައިވަނީ، އޮސްޓްރޭލިޔާގެ ނިންމުން ބިނާވެފައިވަނީ އެ ގައުމުގެ މަސްލަހަތުތަކާއި އަގުތަކުގެ މައްޗަށް ކަމަށާއި، އޮސްޓްރޭލިޔާގެ ބޭރު ސިޔާސަތު ކަނޑައަޅާނީ އެހެން ފަރާތްތަކުން ނޫން ކަމަށެވެ. އަދި ދެ ދައުލަތުގެ ހައްލަކާ ދިމާއަށް ދިއުމަށް އެޅޭ ފިޔަވަޅެއްގެ ގޮތުގައި ފަލަސްތީނުގެ ދައުލަތް ގަބޫލުކުރުން މިހާރު ދެކޭ ކަމަށް އެމަނިކުފާނު ވަނީ ވިދާޅުވެފައެވެ.
މި އަހަރުގެ އޯގަސްޓް މަހު، އޮސްޓްރޭލިޔާއިން ވޞީ އދ. ގެ އާންމު މަޖިލީހުގައި ފަލަސްތީނުގެ ދައުލަތް ގަބޫލުކުރާނެ ކަމަށް ޢިއުލާންކޮށްފައެވެ. މިއީ ދެ ދައުލަތުގެ ހައްލަކާ ދިމާއަށް ދިއުމަށާއި، ޣައްޒާގައި ހަނގުރާމަ ހުއްޓުވުމަށާއި، ހިފަހައްޓާފައިވާ މީހުން ދޫކޮށްލުމަށް ބައިނަލްއަޤްވާމީ ފެންވަރުގައި ކުރެވޭ މަސައްކަތްތަކަށް އެހީތެރިވުމުގެ ގޮތުން އަޅާ ފިޔަވަޅެއްކަމަށް އެ ގައުމުން އެއިރު ވަނީ ބުނެފައެވެ.
މި މައްސަލައިގައި އެމެރިކާގެ ރިޕަބްލިކަނުންނާއި އޮސްޓްރޭލިޔާގެ ސަރުކާރާ ދެމެދު އުފެދިފައިވާ ޚިޔާލު ތަފާތުވުމަކީ، މެދުއިރުމަތީގެ ސިޔާސަތާ ގުޅޭގޮތުން ބައިނަލްއަޤްވާމީ މުޖުތަމަޢުގެ ތެރޭގައި އޮތް ފިކުރީ ތަފާތުވުންތަކުގެ އިތުރު ހެއްކެކެވެ. އޮސްޓްރޭލިޔާއިން މި ނިންމި ނިންމުމަކީ ފަލަސްތީނު-އިސްރާއީލު މައްސަލައަށް ހައްލެއް ހޯދުމަށް އަޅާ މުހިންމު ފިޔަވަޅެއްގެ ގޮތުގައި ދެކޭއިރު، އެމެރިކާގެ ރިޕަބްލިކަނުން މިކަމަށް ފާޑުކިޔަނީ މިއީ ހަމާސްއަށް ހިތްވަރުދޭ ކަމެއްގެ ގޮތުގައި ދެކިގެންނެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!