ތެލުގެ އަގު އިތުރަށް މައްޗަށް އުފުލިދާނެކަމުގެ ބިރު

އިސްރާއީލުން އީރާނުގެ ސައުތު ޕާސް ގޭސް ފީލްޑާއި ޓެހުރާނުގައި ހުރި ތެޔޮ ރިފައިނަރީއަކަށް ހަމަލާދިނުމާ ގުޅިގެން، ތެލުގެ އަގު އިތުރަށް އުފުލިއްޖެ އެވެ.

އީރާނަކީ ދުނިޔޭގައި ދެވަނައަށް އެންމެ ގިނައިން ގުދުރަތީ ގޭސް އަދި ތިންވަނައަށް އެންމެ ގިނައިން ތެޔޮ ލިބޭ ޤައުމެވެ. މި ހަމަލާތަކާ ގުޅިގެން، އީރާނުގެ ތެލުގެ އުފެއްދުންތެރިކަމަށް ބުރޫއަރާފާނެކަމުގެ ބިރު އޮތްނަމަވެސް، މިހާތަނަށް އުފެއްދުންތެރިކަމާއި އެކްސްޕޯޓް ކުރުމުގެ ޤާބިލުކަމަށް އެއްވެސް އަސަރެއް ކޮށްފައެއް ނުވެއެވެ.

މި ހަމަލާތަކާ ގުޅިގެން ތެލުގެ އަގު ވަނީ ބޮޑުތަނުން މައްޗަށް ގޮސްފައެވެ. އެމެރިކާގެ ތެލުގެ އަގު 7.26 އިންސައްތަ އިތުރުވެ، ބެރަލަކަށް 72.98 ޑޮލަރަށް އަރާފައިވެއެވެ. އަދި ބްރެންޓް ކްރޫޑްގެ އަގު 7 އިންސައްތަ އިތުރުވެ، ބެރަލަކަށް 75.55 ޑޮލަރަށް އަރާފައިވެއެވެ. މިއީ 2022 ގެ މާރޗް މަހުން ފެށިގެން ތެލުގެ އަގަށް އައި އެންމެ ބޮޑު އިތުރުވުމެވެ. އެއިރުވެސް ވަނީ 117 އަށް ފީފާއެއްގެ އަގު އުފުލިފައެވެ.

ހަމަލާ ދެވުނު ތަންތަނުގެ ތެރޭގައި ޓެހުރާނުގެ ޝަހްރާން ތެޔޮ ޑިޕޯވެސް ހިމެނެއެވެ. މިއީ 11 ޓޭންކުގައި 260 މިލިއަން ލީޓަރުގެ ޖާގަ ހުރި، އިރާނުގެ ވެރިރަށުގެ އުތުރު ސަރަހައްދަށް ޕެޓްރޯލް، ޑީސަލް އަދި ވައިގެ ދަތުރުފަތުރަށް ބޭނުންކުރާ ތެޔޮ ފޯރުކޮށްދޭ މުހިންމު މަރުކަޒެކެވެ.

އިސްރާއީލުން ބުނެފައިވަނީ މިއީ އީރާނުގެ ނިއުކްލިއަރ ވަސީލަތްތަކާއި، މިސައިލް އުފައްދާ ތަންތަނާއި، އަސްކަރީ ވެރިންނަށް އަމާޒުކޮށް ދިގު މުއްދަތަކަށް ކުރިއަށްގެންދާނެ އޮޕަރޭޝަނެއްގެ ފެށުން ކަމަށެވެ. އަދި އީރާނުން ވަނީ މިކަމަށް ހަރުކަށި ޖަވާބެއް ދޭނެކަމަށް ބުނެފައެވެ.