އެއް މިލިއަނަށްވުރެ ގިނަ ފޮލޯވަރުންތިބި 16 އަހަރުގެ ޓިކްޓޮކް ތަރި މަރުވެއްޖެ

އެއް މިލިއަނަށްވުރެ ގިނަ ފޮލޯވަރުންތިބި އުމުރުން 16 އަހަރުގެ މަޝްހޫރު ޓިކްޓޮކް ތަރި ޖޯޝުއާ ބްލެކްލެޖް އެމެރިކާގައި މަރުވެއްޖެއެވެ.

މިދިޔަ މާރޗް 18 ވަނަ ދުވަހު އޭނާގެ ގޭގައި މަރުވެފައިވާއިރު، ނޯތް ކެރޮލައިނާއިން އުފަންވެފައިވާ ޖޮޝުއާ ގެ މަރުގެ ސަބަބު އަދި ހާމަކުރެވިފައެއް ނުވެއެވެ.

އޭނާގެ އާއިލާއާ ހަވާލާދީ މީޑިއާތަކުން ބަޔާންކޮށްފައިވާ ގޮތުން، ޖޮޝުއާއަކީ ވެސްޓް ކާޓެރެޓް ހައި ސްކޫލްގެ ޖޫނިއަރ ދަރިވަރެކެވެ. އޭނާއަކީ ސްކޫލްގައި ރެސްލިންގ އަދި ޓްރެކް ކުޅިވަރުތަކުގައި ބައިވެރިވި ކުޅުންތެރިއެކެވެ. ޓިކްޓޮކްގައި 1 މިލިއަނަށްވުރެ ގިނަ ފޮލޯވަރުން ލިބިފައިވާ އޭނާ، ގިނައިން ޕޯސްޓްކުރަނީ އެކުވެރިންނާއެކު އަދި ގަލްފްރެންޑާއެކު ހޭދަކުރާ ވަގުތުގެ ވީޑިއޯތަކެވެ.

ޖޮޝުއާއަކީ އައުޓްޑޯއަށް ވަރަށް ލޯބިކުރި ކުއްޖެކެވެ. ޚާއްޞަކޮށް މަސްވެރިކަމާއި، އެކުވެރިންނާއެކު ބޯޓުދުއްވާލުން ފަދަ ފެނާއި ގުޅުންހުރި ކަންކަމަށް ލޯބިކުރިއެވެ. އަދި ކާރު އަދި ޓްރަކްތަކަށްވެސް ވަރަށް ލޯބިކުރިއެވެ. ގޭގައި އޭނާއަކީ މަންމައަށް ކެއްކުމުގައި އެހީތެރިވުމާއި، ގާޑަންކުރުމުގައި އަދި ގޯތިތެރޭގެ މަސައްކަތް ކުރުމަށް އެހީތެރިވާ ކުއްޖެކެވެ.

ޖޮޝުއާގެ ގަލްފްރެންޑް ކަމަށްވާ އެމީ ގިލިކިން، އޭނާއަށް ޓްރިބިޔުޓެއް އަރުވާފައިވާއިރު، ދެމީހުންގެ ގުޅުމުގެ ތަފާތު ވީޑިއޯތައް ޙިއްސާކޮށްފައިވެއެވެ. "މި ލޮބުވެތި ކުއްޖާ މިވަގުތު ނުހަނު ބޮޑަށް ހިތްދަތިވަނީ. އޭނާއާ ނުލާ އަހަރެން މިތާ ހުންނާނެ ކަމަކަށް ހިތަކަށް ނާރާ. އޭނާ އަހަރެންނަށް ދައްކާފައިވަނީ ތެދުވެރި ލޯބި، ކިތަންމެ އުމުރު ހަގުކަމުގައިވިއަސް..." ކަމަށް ޕޯސްޓްކޮށްފައިވެއެވެ.