އެމެރިކާގައި ޓިކްޓޮކް ބަންދުކުރާތީ ޓިކްޓޮކްގެ މަޝްހޫރު ކްރިއޭޓަރުންގެ ފޯކަސް އެހެން ޕްލެޓްފޯމްތަކަށް ހުރިކަމަށް މީޑިއާ ރިޕޯޓްތައް ބުނެފިއެވެ.

ސީއެންބީސީން ރިޕޯޓްކޮށްފައިވާ ގޮތުގައި އެމެރިކާގެ ސަރުކާރުން ދަނީ 19 ޖެނުއަރީ 2025 ގައި ޓިކްޓޮކް އެޕް ބަންދުކުރުމަށް ނިންމާފައިވާ ނިންމުން ތަންފީޒުކުރުމަށް ތައްޔާރުވަމުންނެވެ. މިކަމާ ގުޅިގެން، މިލިއަނުން މީހުން ބޭނުންކުރާ ޓިކްޓޮކްގެ ކޮންޓެންޓް ކްރިއޭޓަރުން އެމީހުންގެ ފޮލޯވަރުންނަށް ވެސް އެހެން ސޯޝަލް މީޑިއާ އެކައުންޓްތަކަށް ފޮލޯކުރުމަށް ދަނީ ގޮވާލަމުންނެވެ.

Ad
rt

މި އެޕް ބަންދުކުރެވިއްޖެނަމަ، އެންމެ ބޮޑު ފައިދާއެއް ލިބޭނީ ގޫގުލްގެ ޔޫޓިއުބް އަދި މެޓާގެ ފޭސްބުކް އަދި އިންސްޓަގްރާމް އަށް ކަމަށް މާހިރުން ލަފާކުރެއެވެ. ވިޔަފާރީގެ ދާއިރާގެ ތަޖުރިބާކާރުން ބުނާގޮތުގައި ޓިކްޓޮކަށް އަންނަ ހުއްޓުމުގެ ސަބަބުން މި ޕްލެޓްފޯމްތަކަށް ވަރަށް ބޮޑު ކުރިއެރުމެއް ލިބޭނެއެވެ.

"ޓިކްޓޮކުން އަހަރެންގެ ހުރިހާ ފޮލޯވަރުން އެހެން ސައިޓްތަކަށް ނާންނާނެ، އެއީ ވަރަށް ހިތާމަވެރި ކަމެއް" ޝިކާގޯގެ 21 އަހަރުގެ ކްރިއޭޓަރެއް ކަމަށްވާ ޖެކް ނޭޑަރ ބުންޏެވެ.

އޭނާ އިތުރަށް ބުނިގޮތުގައި ޓިކްޓޮކް ބަންދުވުމަކީ އެތައް ހާސް ކްރިއޭޓަރުންނަށް ލިބޭނެ ވަރަށް ބޮޑު ގެއްލުމެކެވެ.

މިހާރު ކްރިއޭޓަރުން ވަނީ އެމީހުންގެ ކޮންޓެންޓްތައް އަޕްކުރުމަށް ޔޫޓިއުބް އަދި އިންސްޓަގްރާމް ފަދަ އެހެން ޕްލެޓްފޯމްތަކުގެ އެކައުންޓްތައް ތައްޔާރުކުރަން ފަށައިފައެވެ. އަދި އެމީހުންގެ ޓިކްޓޮކް ފޮލޯވަރުންނަށް މި އެކައުންޓްތަކަށް ފޮލޯކުރުމަށް ވެސް ދަނީ އިލްތިމާސްކުރަމުންނެވެ.