ބައިނަލްއަޤްވާމީ ފައިސާގެ ޖަމްޢިއްޔާ (އައިއެމްއެފް) އިން ރުވާންޑާއަށް 181.7 މިލިއަން ޑޮލަރު ދޫކުރަން ނިންމައިފިއެވެ. މި ނިންމުން ނިންމީ އައިއެމްއެފްގެ އެގްޒެކެޓިވް ބޯޑުން ރުވާންޑާގެ އިޤްތިޞާދީ އެހީތެރިކަމުގެ ޕްރޮގްރާމްތަކުގެ ރިވިއު ނިންމުމަށްފަހުއެވެ.
ހުކުރު ދުވަހުގެ ރޭ ނެރުނު ބަޔާނެއްގައި އައިއެމްއެފްގެ ބޯޑުން ބުނެފައިވަނީ، ރުވާންޑާގެ ޕޮލިސީ ކޯޑިނޭޝަން އިންސްޓްރޫމަންޓް އަދި ރެސިލިއަންސް އެންޑް ސަސްޓެއިނަބިލިޓީ ފެސިލިޓީގެ ހަތަރުވަނަ ރިވިއު އަދި ސްޓޭންޑްބައި ކްރެޑިޓް ފެސިލިޓީގެ ދެވަނަ ރިވިއު ނިންމުމާ ގުޅިގެން މި ފަންޑު ދޫކުރަން ނިންމީ ކަމަށެވެ.
އައިއެމްއެފްއިން ބުނެފައިވާ ގޮތުގައި، މިއަހަރު ރުވާންޑާގެ އިޤްތިޞާދީ ދުވެލި 8.3 އިންސައްތައިގައި ހުންނާނެ ކަމަށް ލަފާކުރެވޭ އިރު، 2025 ވަނަ އަހަރު އެ ރޭޓް 7.0 އިންސައްތައަށް ދަށްވާނެ ކަމަށް ލަފާކުރެވެއެވެ. މިއީ ފާއިތުވި އަހަރު ރެކޯޑުކުރެވުނު 8.2 އިންސައްތައިގެ ކުރިއެރުމަށްފަހު އަންނަ ބަދަލެކެވެ.
"ރުވާންޑާގެ އިޤްތިޞާދު ވަނީ ވަރަށް ވަރުގަދަ ކަމަށް ދައްކުވައިދީފައި، މިއީ މައިގަނޑު ދާއިރާތަކުގެ ހަރުދަނާ ކުރިއެރުމާއި ދަނޑުވެރިކަމުގެ އުފެއްދުންތެރިކަން އިތުރުވުމުގެ ސަބަބުން އައި ކުރިއެރުމެއް، ސެންޓްރަލް ބޭންކުގެ އަމާޒުތަކާ އެއްގޮތްވާ ގޮތުގެ މަތިން އަގުތައް ހުރީ ސްޓޭބަލްކޮށް،" އައިއެމްއެފްއިން ބުނެފައިވެއެވެ.
ނަމަވެސް، ރުވާންޑާގެ އިޤްތިޞާދަށް ބޭރުގެ ނުރައްކާތައް ކުރިމަތިވަމުންދާ ކަމަށް އައިއެމްއެފްއިން ފާހަގަކޮށްފައިވެއެވެ. މީގެ ތެރޭގައި ކަރަންޓް އެކައުންޓް ޑެފިސިޓް އިތުރުވުމާއި ބޭރު ފައިސާގެ އަގަށް ކުރިމަތިވާ ޕްރެޝަރ ހިމެނެއެވެ.
ރުވާންޑާގެ އިޤްތިޞާދު މައިގަނޑު ގޮތެއްގައި ބަރޯސާވަނީ ދަނޑުވެރިކަމާއި، މައުދަނު ކޮނުމާއި، ފަތުރުވެރިކަމާއި އަދި އުފެއްދުންތެރިކަމުގެ ދާއިރާތަކަށެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!