ގާނާގެ ކުރީގެ ރައީސް ޖޯން ޑްރަމާނީ މަހާމާ އެ ގައުމުގެ ރިޔާސީ އިންތިޚާބު ކާމިޔާބުކުރައްވައިފިއެވެ. މިކަން ހާމަވެގެން ދިޔައީ އެމަނިކުފާނުގެ އެންމެބޮޑު ވާދަވެރިޔާ، ނައިބު ރައީސް މަހަމޫދު ބަވުމިއާ އިންތިޚާބުގައި ބަލިވެވަޑައިގަތްކަން ޤަބޫލުކުރެއްވުމާ ގުޅިގެންނެވެ.

އާދީއްތަ ދުވަހު ބޭއްވި ނޫސްވެރިންގެ ބައްދަލުވުމެއްގައި ބަވުމިއާ ވިދާޅުވީ "ގާނާގެ ރައްޔިތުން ވާހަކަ ދައްކައިފި. ރައްޔިތުން މިވަގުތު ބަދަލަށް ވޯޓު ދީފި. އަޅުގަނޑުމެން އެކަން ޤަބޫލުކުރަނީ ވަރަށް އަދަބުވެރިކަމާއެކު" ކަމަށެވެ.

Ad
rt

ހޮނިހިރު ދުވަހު ބޭއްވުނު އިންތިޚާބުގައި ވެރިކަންކުރާ ނިއު ޕެޓްރިއޮޓިކް ޕާޓީ (އެންޕީޕީ) ގެ ދެ ދައުރު ނިމުމަކަށް އައިސްފައިވެއެވެ. ރައީސް ނާނާ އަކުފޯ-އަޑޯގެ ވެރިކަމުގައި ގާނާއަށް ދިމާވި އެންމެ ގޯސް އިޤްތިޞާދީ ހީނަރުކަމުގެ ތެރޭގައި އަގުތައް އުފުލުމާއި ދަރަނި އަދާނުކުރެވުން ހިމެނެއެވެ.

ބަވުމިއާ ވިދާޅުވީ ނެޝަނަލް ޑިމޮކްރެޓިކް ކޮންގްރެސް (އެންޑީސީ) ގެ މަހާމާއަށް ގުޅުއްވައި މަރުޙަބާ ދަންނަވައިފައިވާ ކަމަށެވެ.

މީގެ ކުރިން، އެންޑީސީގެ ތަރުޖަމާނު ސަމީ ގިޔާމްފީ ނޫސްވެރިންނަށް ވިދާޅުވީ ޕާޓީގެ އަމިއްލަ ނަތީޖާ ދައްކާގޮތުން މަހާމާއަށް 56.3 އިންސައްތަ ވޯޓު ލިބިވަޑައިގެންފައިވާއިރު ބަވުމިއާއަށް ލިބިވަޑައިގެންފައިވަނީ 41.3 އިންސައްތަ ވޯޓު ކަމަށެވެ.

"މި ޤައުމުގެ ރައްޔިތުން ބަދަލަށް ވޯޓު ދީފައިވާކަން ވަރަށް ސާފު" ކަމަށް ގިޔާމްފީ ވިދާޅުވިއެވެ.

2012 ގެ ޖުލައި މަހުން 2017 ގެ ޖެނުއަރީ މަހާ ހަމައަށް ގާނާގެ ރައީސްކަން ކުރެއްވި މަހާމާ އެކްސް (ކުރީގެ ޓްވިޓަރ) ގައި ވިދާޅުވެފައިވަނީ އެމަނިކުފާނުގެ "ފާޅުކަން ބޮޑު ކާމިޔާބީ" އަށް މަރުޙަބާ ދަންނަވަން ބަވުމިއާ ގުޅުއްވި ކަމަށެވެ.

65 އަހަރުގެ މަހާމާގެ ސަޕޯޓަރުން ވަނީ މިކާމިޔާބީ ފާހަގަކޮށް އުފާފާޅުކުރަމުން، ވެރިރަށް އައްކުރާގައި ހުރި ޕާޓީގެ ކެމްޕޭން މައި މަރުކަޒު ކައިރީގައި އެއްވާން ފަށާފައެވެ.

އެމަނިކުފާނުގެ ކެމްޕޭނުގައި ޤައުމުގެ އެކި ދާއިރާތައް "އަލުން ބައްޓަންކުރުމަށް" ވަޢުދުވެވަޑައިގެންނެވިއެވެ. އަދި ޒުވާނުންގެ ތާއީދު ހޯއްދެވުމަށް މަސައްކަތް ކުރެއްވިއެވެ.

މި އިންތިޚާބަކީ ގާނާގެ އިޤްތިޞާދީ ޙާލަތު ދަށްވެފައިވާ ދަނޑިވަޅެއްގައި ބޭއްވުނު އިންތިޚާބެކެވެ. އިންފްލޭޝަން މަތިވެ، ދަރަނި އަދާނުކުރެވި، އެ ގައުމުގެ ފައިސާގެ އަގު ވެއްޓި، އަދި ދިރިއުޅުމުގެ ޚަރަދު އުފުލިފައިވާ މި ދަނޑިވަޅުގައި ރައްޔިތުން ބަދަލަކަށް އެދުނުކަން މި އިންތިޚާބުގެ ނަތީޖާއިން ދައްކައިދެއެވެ.

މަހާމާގެ ކާމިޔާބާއެކު، ގާނާގެ ސިޔާސީ މަޝްރަޙުގައި އައު ބަދަލުތަކެއް އަންނާނެކަމަށް ބެލެވެއެވެ. އެމަނިކުފާނު ވަނީ އިޤްތިޞާދު ރަނގަޅުކުރުމަށާއި، ވަޒީފާގެ ފުރުޞަތުތައް އިތުރުކުރުމަށާއި، އަދި ކޮރަޕްޝަނާ ދެކޮޅަށް ހަރުދަނާ ފިޔަވަޅުތަކެއް އެޅުމަށް ވަޢުދުވެވަޑައިގެންފައެވެ.