އިންޑިޔާގެ ވެރިރަށް ނިއު ދިއްލީގައި ރެކޯޑް މިންވަރަކަށް ވައި ތަޣައްޔަރުވުމުގެ ސަބަބުން އެ ސިޓީގެ ހުރިހާ ސްކޫލްތަކެއް ބަންދުކޮށް މިކަމާ ގުޅިގެން ސަރުކާރުން އިތުރު ފިޔަވަޅުތަކެއް އަޅައިފިއެވެ.

އިންޑިޔާގެ ތަޣައްޔަރުވުން ކޮންޓްރޯލްކުރާ އޮތޯރިޓީން ބުނާ ގޮތުގައި ވެރިރަށުގެ 24 ގަޑިއިރުގެ ވައި ތަޣައްޔަރުވުމުގެ މިންގަނޑު (އޭކިއުއައި) ވަނީ 484 ގައެވެ. މިއީ "ސިވިއަރ ޕްލަރ ޕްލަސް" ކަމަށް ބެލެވޭ އަދި މިއަހަރުގެ އެންމެ މަތީ މިންވަރެވެ.

Ad
rt

މޫސުމުގެ ހާލަތު ގޯސްވެ، ވައިގެ ބާރު ކުޑަވުމާ ގުޅިގެން އޮތޯރިޓީތަކުން ވަނީ ދިއްލީގެ ހުރިހާ ސްކޫލްތަކެއްގައި އޮންލައިންކޮށް ކިޔަވައިދިނުމަށް އަންގާފައެވެ. މީގެ އިތުރުން، އިމާރާތްކުރުމުގެ މަސައްކަތްތަކާއި އުޅަނދުފަހަރު ދުއްވުމާ ގުޅޭ ގޮތުން އިތުރު ހަރުކަށި ފިޔަވަޅުތަކެއް އަޅާފައިވެއެވެ.

ސްވިޓްޒަލޭންޑްގެ އައިކިއުއެއަރގެ ލައިވް ރޭންކިންގ އިން ދައްކާގޮތުގައި ނިއު ދިއްލީއަކީ މިވަގުތު ދުނިޔޭގެ އެންމެ ތަޣައްޔަރުވެފައިވާ ސިޓީއެވެ. މިގޮތުން ވައިގެ ފެންވަރު ވަނީ "ނުރައްކާތެރި" މިންވަރުގެ 1،081 ގައެވެ. އަދި ޕީއެމް 2.5 ގެ މިންވަރު ވަނީ ދުނިޔޭގެ ސިއްހީ ޖަމްއިއްޔާއިން ލަފާދޭ މިންވަރަށްވުރެ 130.9 ގުނަ މަތީގައެވެ.

މިއަދު ހެނދުނު ފެންނަ ދުރުމިން ވަނީ 100 މީޓަރަށް ދަށްވެފައެވެ. ނަމަވެސް، އޮތޯރިޓީތަކުން ބުނާ ގޮތުގައި ވައިގެ އަދި ރޭލުގެ ދަތުރުތައް ކުރިއަށްދަނީ ލަސްވުންތަކަކާއެކު ނަމަވެސް ހުއްޓުމެއް ނެތިއެވެ.

ކޮންމެ އަހަރެއްގެވެސް ފިނިމޫސުމުގައި މިފަދަ ދުމާއި އަނދިރި އާންމުވެއެވެ. މޫސުމާބެހޭ އޮފިޝަލުން ވިދާޅުވާގޮތުން މިމައްސަލަ މިހާބޮޑުވެފައިވަނީ ކައިރި ސްޓޭޓްތަކުގައި ޤާނޫނާ ޚިލާފަށް ކުރާ ދަނޑުބިންތަކުގެ އަލިފާނުގެ ދުމާއި، އެހެނިހެން ދުމާއި، ކުނޑިފަދަ ތަކެތި ޖަމާވުމުގެ ސަބަބުންނެވެ. މި ހާލަތާ ގުޅިގެން އަޅާފައިވާ ފިޔަވަޅުތަކުން ވައި ތަޣައްޔަރުވުން ކުޑަކުރެވޭނެ ކަމަށް އެފަރާތްތަކުން އުންމީދު ކުރެއެވެ.