ބްރިކްސް (ބްރެޒިލް، ރަޝިޔާ، އިންޑިޔާ، ޗައިނާ އަދި ސައުތު އެފްރިކާ) ގްރޫޕަށް ތުރުކީވިލާތުން ވަނުމަށް ހުށަހެޅި ހުށަހެޅުން އިންޑިޔާއިން ބްލޮކްކޮށްފިއެވެ. މި ނިންމުން ނިންމާފައިވަނީ ތުރުކީވިލާތާއި ޕާކިސްތާނާ ދެމެދު އޮތް ގާތް ގުޅުމުގެ ސަބަބުންނެވެ.
ތުރުކީވިލާތުން ބްރިކްސްއަށް ވަނުމަށް ހުށަހެޅި ހުށަހެޅުމަށް ބްރިކްސްގެ ގިނަ މެންބަރު ޤައުމުތަކުން ތާއީދު ކޮށްފައިވާއިރު، މަޝްވަރާތައް ނިމުމަކާ ގާތްވެފައިވާކަމަށް ރިޕޯޓުތަކުގައި ބުނެފައިވެއެވެ. ނަމަވެސް އިންޑިޔާއިން މި ހުށަހެޅުން ބްލޮކްކުރުމާ ގުޅިގެން ތުރުކީވިލާތަށް ބްރިކްސްއަށް ވަދެވިފައެއް ނުވެއެވެ.
ތުރުކީވިލާތުގެ ހުށަހެޅުން ބަލައިނުގަތުމުގެ އިތުރުން، 2024 ވަނަ އަހަރަށް އެއްވެސް އައު މެންބަރަކު ނުހިމެނުމަށް ބްރިކްސްއިން ނިންމާފައިވެއެވެ. ނަމަވެސް 13 އައު ޤައުމެއް ރަސްމީ ޕާޓްނަރ ޤައުމުތަކެއްގެ ގޮތުގައި ބަލައިގަނެ، ބްރިކްސްގެ ބައެއް މަސައްކަތްތަކުގައި ބައިވެރިވުމުގެ ފުރުސަތު ދީފައިވެއެވެ.
އިންޑިޔާގެ މި ހަރުކަށި ސިޔާސަތަކީ ދެކުނު އޭޝިޔާގެ ސަރަޙައްދީ ސަލާމަތާ ގުޅޭގޮތުން އެ ޤައުމުގެ ކަންބޮޑުވުންތައް ދައްކުވައިދޭ ކަމެކެވެ. އަދި ޖައްމޫ އަދި ކަޝްމީރު ފަދަ ސަރަޙައްދުތަކުގައި ހަމަނުޖެހުން އުފެއްދުމުގައި ތުރުކީވިލާތާއި ޕާކިސްތާނުގެ ދައުރާމެދު އިންޑިޔާއިން ކަންބޮޑުވާކަން ފާހަގަކޮށްފައިވެއެވެ.
މި ހާދިސާއިން ދައްކުވައިދެނީ ބްރިކްސްގެ ފުޅާވުމާ ގުޅޭ ނިންމުންތަކަށް ސަރަޙައްދީ ސިޔާސީ ކަންކަމުގެ އަސަރު ކުރާ މިންވަރެވެ. އަދި ބައިނަލްއަޤްވާމީ ގުޅުންތައް ބަދަހިކުރުމަށް ތުރުކީވިލާތުން ކުރަމުންދާ މަސައްކަތްތަކުގައި ދިމާވާ ގޮންޖެހުންތައް ވެސް ހާމަކޮށްދެއެވެ.
ބައެއް ތަޙުލީލުވެރިން ދެކޭގޮތުގައި ތުރުކީވިލާތުން ބްރިކްސްއަށް ވަނުމަށް ހުށަހެޅި ހުށަހެޅުމަކީ ސްޓްރެޓެޖިކް ވިސްނުމެއް ނެތި ކުރި ކަމެކެވެ. އެއީ ޕާކިސްތާނާއެކު އޮތް ގުޅުމުގެ ސަބަބުން ހުށަހެޅުން ބަލައިނުގަތުމުގެ ފުރުސަތު ބޮޑުކަން ސާފުކޮށް އެނގެން އޮތް ކަމެއް ކަމަށް އެފަރާތްތަކުން ބުނެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!