އެމެރިކާގެ ބިލިއަނަރު އަދި ޓެސްލާގެ ސީއީއޯ އީލޮން މަސްކް އެމެރިކާގެ ޤާނޫނު އަސާސީގެ 1 ވަނަ އަދި 2 ވަނަ އިޞްލާޙަށް ތާއީދުކުރާ ޕެޓިޝަނެއްގައި ސޮއިކުރާ ފަރާތްތަކަށް ކޮންމެ ދުވަހަކު 1 މިލިއަން ޑޮލަރު ހަދިޔާކުރާނެ ކަމަށް ބުނެ ގިވްއަވޭއެއް އިޢުލާނުކޮށްފިއެވެ.

މި އިޢުލާނު މަސްކް ކުރީ ޕެންސިލްވޭނިއާގެ ހެރިސްބަރގްގައި ބޭއްވުނު ޓައުން ހޯލް ބައްދަލުވުމެއްގައެވެ. މި ބައްދަލުވުމުގައި މަސްކް ވިދާޅުވީ، ނޮވެމްބަރު މަހުގެ 5 ވަނަދުވަހު އޮންނަ އެމެރިކާގެ ރިޔާސީ އިންތިޚާބާ ހަމައަށް ކޮންމެ ދުވަހަކު 1 މިލިއަން ޑޮލަރު، ޕެޓިޝަނުގައި ސޮއިކުރާ މީހުންގެ ތެރެއިން ރޭންޑަމްކޮށް ހޮވޭ މީހަކަށް ހަދިޔާކުރާނެ ކަމަށެވެ.

Ad
rt

މި އިޢުލާނާ ގުޅިގެން ސޯޝަލް މީޑިއާގައި މަސްކްއަށް ފާޑުކިޔުންތަކެއް އަމާޒުވެފައިވެއެވެ. ގިނަ ބަޔަކު ދެކޭ ގޮތުގައި މިއީ ކޮރަޕްޓް އަދި އަޚްލާޤީ ގޮތުން ރަނގަޅުނޫން ޢަމަލެކެވެ. ބައެއް މީހުން މި ކަމަކީ ވޯޓު ގަތުން ކަމަށް ބުނެ، މިއީ ޤާނޫނީ ގޮތުން ހުއްދަ ކަމެއްތޯ ސުވާލު އުފައްދާފައިވެއެވެ.

ނަމަވެސް މަސްކްގެ މި ޢަމަލަށް ތާއީދުކުރާ ފަރާތްތަކެއްވެސް ވެއެވެ. އެ ފަރާތްތަކުން ދެކޭގޮތުގައި މިއީ ޢާންމު ރައްޔިތުންގެ އަތަށް 1 މިލިއަން ޑޮލަރު ފޯރުކޮށްދިނުމާއެކު، ނިޒާމަށް ބަދަލު ގެނައުމުގެ ވިސްނުންތޫނު އިސްނެގުމެކެވެ.

އެމެރިކާގެ ޤާނޫނު އަސާސީއަށް ހުށަހެޅިފައިވާ ފުރަތަމަ އިޞްލާޙަކީ އެމެރިކާގެ ޤާނޫނު އަސާސީގައި ރައްޔިތުންގެ އަސާސީ މިނިވަންކަން ކަށަވަރުކޮށްދޭ އެންމެ މުހިންމު ބައެވެ. މި އިޞްލާޙުން ޚިޔާލުފާޅުކުރުމުގެ މިނިވަންކަން، ނޫސްވެރިކަމުގެ މިނިވަންކަން، ދީނީ މިނިވަންކަން، އެއްވެއުޅުމުގެ މިނިވަންކަން އަދި ސަރުކާރަށް ޝަކުވާ ހުށަހެޅުމުގެ ޙައްޤު ކަށަވަރުކޮށްދެއެވެ. މިއީ ޑިމޮކްރަސީއެއްގެ އަސާސްކަމަށް ބެލެވޭ އަދި އެމެރިކާގެ މިނިވަން މުޖުތަމަޢުގެ ބިންގަލެވެ.

ދެވަނަ އިޞްލާޙަކީ ރައްޔިތުންނަށް ހަތިޔާރު ގެންގުޅުމާއި އަތުގައި ބެހެއްޓުމުގެ ޙައްޤު ކަށަވަރުކޮށްދޭ އިޞްލާޙެވެ. މި އިޞްލާޙު ވުޖޫދަށް އައީ އަމިއްލަ ނަފްސު ދިފާޢުކުރުމާއި، މިނިވަންކަން ހިމާޔަތްކުރުމަށް ކަމަށް ބެލެވެއެވެ. ނަމަވެސް، މި އިޞްލާޙުގެ މާނަކުރުމާއި ތަންފީޒުކުރުމާ ގުޅޭގޮތުން އެމެރިކާގެ ސިޔާސީ އަދި ޤާނޫނީ ދާއިރާގައި ގިނަ ބަހުސްތަކެއް ކުރެވެމުންދެއެވެ.

މަސްކްގެ މަޤްޞަދަކީ ސްވިންގް ސްޓޭޓްތަކުގެ ވޯޓަރުންނަށް އަމާޒުކުރުން ކަމަށް ބުނެފައިވާއިރު، މިހާތަނަށް ޑިމޮކްރެޓިކް ޕާޓީގެ ކެންޑިޑޭޓު ކަމަލާ ހެރިސް އުޅެނީ އާރލީ ވޯޓިންގގައި ކުރީގައެވެ.

މި މައްސަލައާ ގުޅޭގޮތުން އިތުރު ތަޙްޤީޤުތަކެއް ކުރެވިދާނެ ކަމަށް ބެލެވެއެވެ.