ރަޝިޔާގެ ރައީސް ވުލަޑިމިރް ޕުޓިން އިރާނުގެ ރައީސް މަސްއޫދު ޕެޒެޝްކިއަންއާ ބައްދަލުކުރައްވަން މި ހަފުތާގެ ހުކުރު ދުވަހު ތުރުކްމެނިސްތާނަށް ދަތުރުކުރައްވާ ވާހަކަ ރަޝިޔާގެ ސަރުކާރުން ހާމަކޮށްފިއެވެ.

ރަޝިޔާގެ ރައީސްގެ އެހީތެރިއެއް ކަމަށްވާ ޔޫރީ އުޝަކޯވް ވިދާޅުވި ގޮތުގައި މި ދެ ލީޑަރުން ބައްދަލުކުރައްވާނީ ތުރުކްމެނިސްތާނުގެ ވެރިރަށް އަޝްގަބާތުގައި ބޭއްވޭ ތުރުކްމެނިސްތާނުގެ ޝާއިރެއްގެ ހަނދާނީ ޖަލްސާއެއްގައެވެ. މި ބައްދަލުވުމަކީ ދެ ގައުމުގެ ގުޅުމާއި މެދު އިރުމަތީގައި ހަލަބޮލިވެފައިވާ ހާލަތާ ބެހޭ ގޮތުން މަޝްވަރާކުރުމަށް ވަރަށް މުހިންމު ބައްދަލުވުމެއް ކަމަށް އޭނާ ވިދާޅުވިއެވެ.

Ad
rt

މި ބައްދަލުވުން ބޭއްވޭނީ މެދު އޭޝިޔާގެ ގައުމުތަކުގެ ލީޑަރުން 18 ވަނަ ގަރުނުގެ ޝާއިރު މަގްތިމްގުލީ ޕިރަގީގެ 300 ވަނަ އަހަރީ ދުވަސް ފާހަގަކުރުމަށް ބާއްވާ ޖަލްސާއެއްގައެވެ. ޕުޓިން މި ޖަލްސާގައި ބައިވެރިވެވަޑައިގަންނަވާ ކަން ކުރިން އިއުލާނުކޮށްފައެއް ނުވެއެވެ.

މި ބައްދަލުވުން ބޭއްވެނީ އިސްރާއީލުން ލުބުނާނަށް ހަމަލާދެމުންދާއިރު، ރަޝިޔާއިން އެ ގައުމުގައި ތިބި އެ ގައުމުގެ ރައްޔިތުން އަނބުރާ ގެންދަން ފަށާފައިވާ ދަނޑިވަޅެއްގައެވެ. އަދި މީގެ ކުރިން ރަޝިޔާގެ ބޮޑުވަޒީރު މިހައިލް މިޝުސްޓިން އިރާނަށް ދަތުރުކުރައްވައި އެ ގައުމުގެ ރައީސާއި ފުރަތަމަ ނައިބު ރައީސާ ބައްދަލުކުރެއްވިއެވެ.

ރަޝިޔާއާއި އިރާނަކީ ގާތް ގުޅުމެއް އޮންނަ ދެ ގައުމެވެ. ހަނގުރާމައިގެ ހަތިޔާރު އިރާނުން ރަޝިޔާއަށް ވިއްކާ ކަމަށް ބުނެ ހަނގުރާމާގެ ވެރިކަން ކުރާ ގައުމުތަކުން އިރާނަށް ތުހުމަތުކުރަމުން ދިޔަ ނަމަވެސް އިރާނުން އެކަން ދަނީ ދޮގުކުރަމުންނެވެ.

ޕެޒެޝްކިއަން މި މަހު ރަޝިޔާއަށް ދަތުރުކުރައްވައި ބްރިކްސް ސަމިޓުގައި ބައިވެރިވެވަޑައިގަންނަވާނެ ކަމަށްވެސް ބައެއް ރިޕޯޓްތައް ބުނެއެވެ. އެ ދަތުރުފުޅުގައިވެސް އޭނާ ޕުޓިންއާ ބައްދަލުކުރައްވާނެ ކަމަށް ލަފާކުރެވެއެވެ.