ރީޑިންގ ނުނަގާ އަދި ބޭނުން ނުކުރާ ކަރަންޓަކަށް ބިލެއް ނުކުރާނެކަމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ބުނެފި އެވެ.

ސްޓެލްކޯއިން ހާމަކުރި ގޮތުގައި، ކުންފުނީގެ މުވައްޒަފުން ދިވެހިރާއްޖޭގެ އެކި ކަންކޮޅުތަކުގައި 24 ގަޑިއިރު މެދުނުކެނޑި ކަރަންޓުގެ ޚިދުމަތް ފޯރުކޮށްދިނުމުގެ މަސައްކަތް ކުރަމުންދެއެވެ. މީގެ ތެރޭގައި ކޮންމެ މަހަކު ކަސްޓަމަރުންގެ ގޭގެއަށް ގޮސް މީޓަރު ރީޑިންގ ނެގުމާއި، ބިލު ތައްޔާރުކުރުމާއި، ފޮނުވުމާއި، ފައިސާ ބަލައިގަތުން ހިމެނެއެވެ.

Ad
rt

ކުންފުނިން އިތުރަށް ބުނެފައިވަނީ މި ހުރިހާ މަސައްކަތެއް ވެސް ކުރަމުންދަނީ ހަރުދަނާ ގަވާއިދުތަކާއި އުސޫލުތަކާ އެއްގޮތަށް ކަމަށެވެ. އަދި މި އުސޫލުތަކާ ޚިލާފަށް ކުންފުނިން އަމަލު ނުކުރާނެ ކަމުގެ ޔަޤީންކަން ވެސް ދީފައިވެއެވެ.

ސްޓެލްކޯއިން ފާހަގަކޮށްފައިވާ ގޮތުގައި، ކުންފުނީގެ މުވައްޒަފުންނަކީ ވެސް ކުންފުނީގެ ކަސްޓަމަރުންނެވެ. އެހެންކަމުން، އެ މުވައްޒަފުންނަށް ވެސް ބިލު ކުރަނީ އެހެން ކަސްޓަމަރުންނާ އެއް އުސޫލަކުންނެވެ.

ކުންފުނީގެ ޚިދުމަތާ މެދު ނޭދެވޭ ވާހަކަތައް ފަތުރަމުންދާ ކަމަށް ބުނެ، އެކަން ސްޓެލްކޯއިން ވަނީ ކުށްވެރިކޮށްފައެވެ. އަދި މިފަދަ "ޒިންމާދާރުކަން ކުޑަ" ވާހަކަތަކަކީ ކުންފުނީގެ އަގު ވައްޓާލުމަށް ދައްކާ ވާހަކަތަކެއް ކަމަށް ބުނެފައިވެއެވެ.

ސްޓެލްކޯގެ ޚިދުމަތާ ބެހޭ ގޮތުން އިތުރަށް ބަލަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށް ވެސް ކުންފުނިން ބުނެފައިވެއެވެ. އަދި ކުރިއަށް އޮތް ތަނުގައި ވެސް ރައްޔިތުންނަށް އިޚްލާޞްތެރި ޚިދުމަތެއް ފޯރުކޮށްދިނުމަށް މަސައްކަތް ކުރާނެ ކަމުގެ ޔަޤީންކަން ދީފައިވެއެވެ.

75 އަހަރުގެ ދިގު ތާރީޚެއް އޮތް އެ ކުންފުނިން އަންނަނީ ކަސްޓަމަރުންނަށް ފޯރުކޮށްދެމުންދާ ޚިދުމަތުގެ އިތުބާރާއި ޒިންމާދާރުކަން އަލުން ކަށަވަރު ކުރުމަށް ގިނަ ކަންތައްތަކެއް އަންނަނީ ކުރަމުންނެވެ.