މާލެ ސިޓީ ކައުންސިލުން ހިއްސާކުރި މަޢުލޫމާތަކާ ގުޅިގެން، އިއްޔެ ހިންގުނު ޚާއްޞަ ރެއިޑެއްގައި މ. ރީތި އޯކިޑްގައި ހުރި ފޯއް ކޮށާ ފެކްޓްރީއެއް ބަންދުކޮށް، އެތަނުގައި ގަވާއިދާ ޚިލާފަށް އުޅެމުންދިޔަ 2 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
މި ފެކްޓްރީއަކީ ދިވެހިން އާންމުކޮށް ދުފުމުގައި ބޭނުންކުރާ ފޯއް ވިޔަފާރިއަށް ތައްޔާރުކުރަމުންދިޔަ ތަނެއްކަމަށާއި، އެތަނުގެ ސާފުތާހިރުކަން އިންތިހާއަށް ދަށްކަމަށް ފާހަގަކުރެވިފައިވާކަމަށް އިމިގްރޭޝަން އިން ބުނެފައިވެއެވެ.
މިކަން ވަނީ ކަމާބެހޭ އިދާރާތަކުގެ ސަމާލުކަމަށް ގެނެވިފައިންކަމަށް އެފަރާތުން ބުނެއެވެ.
މީގެއިތުރުން، "އިމިގްރޭޝަން ވޮޗް" އަށް ލިބުނު މަޢުލޫމާތަކާ ގުޅިގެން، އެސް.އެމް.އީ ހަބްގައި ގަވާއިދާ ޚިލާފަށް ވިޔަފާރިކުރަމުންދިޔަ 3 ބިދޭސީއަކުވެސް ވަނީ އިމިގްރޭޝަންގެ ބެލުމުގެ ދަށަށް ގެނެވިފައެވެ. މި ރެއިޑްތައް ކުރިއަށް ގެންދިޔައީ ގަވާއިދާ ޚިލާފަށް އުޅޭ ބިދޭސީންނާ ގުޅޭގޮތުން މާލެ ސިޓީ ކައުންސިލުން ހިއްސާކުރި މަޢުލޫމާތުތަކަކާ ގުޅިގެންނެވެ.
މި ރެއިޑްތަކުގައި ޖުމްލަ 5 ބިދޭސީން ވަނީ ހައްޔަރުކުރެވިފައެވެ. އަދި ފޯއް ކޮށާ ފެކްޓްރީ ބަންދުކުރުމާއެކު، އެތަނުގެ ސާފުތާހިރުކަން ދަށްވުމާ ގުޅޭގޮތުން އިތުރު ފިޔަވަޅުތަކެއް އަޅާނެކަމަށް ކަމާބެހޭ އިދާރާތަކުން މަޢުލޫމާތު ދީފައިވެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!