ރައީސް އޮފީހުގެ މިނިސްޓަރު އާދަމް ރަމީޒް، މިއަދު މަޤާމުން ވަކިކުރައްވައިފިކަމަށް ރައީސް އޮފީހުގެ ތަރުޖަމާނު ހީނާ ވަލީދު މީޑިއާތަކަށް ކަށަވަރުކޮށްދެއްވައިފިއެވެ.
ރަމީޒް މަޤާމުން ވަކިކުރެއްވީ، އޭނާއާ ގުޅުންހުރި މައްސަލައެއް ތަޙުޤީޤުކުރެވެމުންދާތީ، މިދިޔަ ޖޫން މަހުގެ 27 ވަނަ ދުވަހު ސަސްޕެންޑް ކުރެއްވުމަށްފަހުގައެވެ.
ރަމީޒާއެކު، އޭނާގެ ކުރީގެ އަނބިކަނބަލުން އަދި ކުރިން ތިމާވެށްޓާބެހޭ މިނިސްޓްރީގެ ސްޓޭޓް މިނިސްޓަރުކަން ކުރެއްވި ފާޠިމަތު ޝަމްނާޒް ޢަލީ ސަލީމް ވެސް ސަސްޕެންޑް ކުރެވުނެވެ. ޝަމްނާޒް ސަސްޕެންޑް ކުރެވުނީ ސިހުރުހެދުމުގެ މައްސަލައެއްގައި ފުލުހުން ތަޙުޤީޤުކުރަމުންދަނިކޮށް، އޭނާއާއި އޭނާގެ ކޮއްކޮ ހައްޔަރުކޮށް ބަންދުކުރުމާ ގުޅިގެންނެވެ. ނަމަވެސް، މި މައްސަލައިގައި ރަމީޒަށް އެއްވެސް ތުހުމަތެއް ކުރެވޭކަން އެނގިފައެއް ނުވެއެވެ.
ޝަމްނާޒާއި އޭނާގެ ކޮއްކޮ ޙައްވާ ސަނާ ސަލީމްގެ މައްޗަށް ދަޢުވާ ނުކުރުމަށް ޕްރޮސިކިއުޓަރ ޖެނެރަލްގެ އޮފީހުން ނިންމަވާފައިވާކަން ފާހަގަކުރެވެއެވެ. މި ނިންމެވީ އެ ދެ ފަރާތުގެ މައްޗަށް އެކަށީގެންވާ ހެކި ނެތުމުގެ ސަބަބުންކަމަށް ޕްރޮސިކިއުޓަރ ޖެނެރަލްގެ އޮފީހުން ހާމަކުރައްވާފައިވެއެވެ.
އާދަމް ރަމީޒަކީ ރައީސް ޑރ. މުޙައްމަދު މުޢިއްޒުގެ ގާތް އެކުވެރިއެކެވެ. އެ ދެ ބޭފުޅުން މާލޭ ސިޓީ ކައުންސިލުގައި ވެސް އެކުގައި މަސައްކަތްކުރައްވާފައިވެއެވެ. ރައީސް އޮފީހަށް އެންމެ ފުރަތަމަ ޢައްޔަންކުރެއްވި ބޭފުޅުންގެ ތެރޭގައި ރަމީޒު ހިމެނިވަޑައިގަންނަވައެވެ. ނަމަވެސް، މިފަހުން ސަރުކާރުގެ ހަރަކާތްތަކުން ރަމީޒު ހުރީ އެކަހެރިކޮށްފައިކަމަށް ލަފާކުރެވެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!