ޓައިވާން ސަރަހައްދުގައި ޗައިނާގެ އަސްކަރީ ހަރަކާތްތައް އިތުރުވެގެން ދާކަމަށް ޓައިވާންގެ ޑިފެންސް މިނިސްޓްރީން މިއަދު ހާމަކޮށްފިއެވެ.

މިނިސްޓްރީގެ ބަޔާނެއްގައި ބުނެފައިވަނީ ފާއިތުވި 24 ގަޑިއިރުގެ ތެރޭގައި ރެކޯޑު އަދަދެއްގެ ޗައިނާގެ އަސްކަރީ އުޅަނދުތައް ޓައިވާން ސަރަހައްދާ ކައިރިން ފެނިފައިވާ ކަމަށެވެ.

Ad
rt

ޓައިވާންގެ ޑިފެންސް މިނިސްޓްރީގެ މަޢުލޫމާތު ދައްކާގޮތުން، މި މުއްދަތުގެ ތެރޭގައި ޖުމްލަ 66 ހަނގުރާމަވެރި މަތިންދާބޯޓާއި 7 އަސްކަރީ ކަނޑު އުޅަނދު ފެނިފައިވެއެވެ. އޭގެ ތެރެއިން 56 މަތިންދާބޯޓު ޗައިނާއާއި ޓައިވާން ދެމެދުގައިވާ މެދުމިނުގެ ރޮނގު ހުރަސްކޮށްފައިވާކަމަށްވެސް ވަނީ ފާހަގަކޮށްފައެވެ.

މި ހާދިސާ ހިނގާފައިވަނީ އެމެރިކާގެ ވެރިރަށް ވޮޝިންގްޓަން ޑީސީގައި ނޭޓޯ ސަމިޓް ބޭއްވެމުންދާ ދަނޑިވަޅެއްގައެވެ. މިއީ މިދިޔަ މެއި މަހު ޗައިނާއިން ޓައިވާން ސަރަހައްދުގައި ހިންގި އަސްކަރީ ތަމްރީނުތަކަށްފަހު އަނެއްކާވެސް އެ ސަރަހައްދުގައި ޗައިނާގެ އަސްކަރީ ހަރަކާތްތައް އިތުރުވެގެން ދިޔަ ފުރަތަމަ ފަހަރެވެ.

އަމިއްލަ ވެރިކަމެއްގެ ގޮތުގައި މިނިވަންކަމަށް ދަޢުވާކުރާ ޓައިވާނުން މިހާރު ދަނީ ޗައިނާއިން އަންނަ ކޮންމެ ނުރައްކަލަކަށް ތައްޔާރުވަމުންނެވެ. ޓައިވާނުން މިކަމާ ގުޅިގެން ކަންބޮޑުވުން ފާޅުކޮށް، އެ ސަރަހައްދުގެ ސަލާމަތާއި ރައްކާތެރިކަމަށް އިތުރު ފިޔަވަޅުތަކެއް އަޅަމުންދާކަން ފާހަގަކުރެވެއެވެ.