ފަލަސްތީނުގެ ހުޅަނގު އައްސޭރީގައި އިޒްރޭލުން ގަދަބާރުން ޔަހޫދީންނަށް ގެދޮރު އަޅަން ނިންމުމުން ސައުދީ އަރަބިއްޔާ އިން އެކަން ކުށްވެރިކޮށްފިއެވެ.

އިޒްރޭލުގެ ކެބިނެޓުން މިދިޔަ ހަފްތާގައި ވަނީ އިޒްރޭލުން ގަދަ ކަމުން ހިފާފައިވާ ފަލަސްތީނުގެ ހުޅަނގު އައްސޭރީގައި ޔަހޫދީން ވަޒަންވެރި ކުރުވުން ފުޅާ ކުރަން ފާސްކޮށްފައެވެ.

Ad
rt

ހޮނިހިރު ދުވަހު ސައުދީ އަރަބިއްޔާގެ ޚާރިޖިއްޔާ އިން ނެރުނު ބަޔާނެއްގައި ބުނެފައިވަނީ، އިޒްރޭލުގެ އެ ނިންމުމަކީ އިޒްރޭލުން ބައިނަލް އަގްވާމީ ގާނޫނުތަކާއި، ކަމާ ބެހޭ ގޮތުން ފާސް ކޮށްފައިވާ ގަރާރުތަކާއި ޚިލާފަށް ކުރަމުންދާ ކަމެއް ކަމަށެވެ. އަދި އެކަމުގެ ނަތީޖާ ވަރަށް ގޯސްވާނެ ކަމަށް ބުނެ ސައުދީގެ ބަޔާނުގައި އިޒްރޭލަށް ވަނީ އިންޒާރުކޮށްފައެވެ.

އިޒްރޭލުގެ މި އަމަލުގެ ސަބަބުން ސުލްހަ އަށް ކުރެވޭ މަސައްކަތައް ހުރަސް އެޅި ހަމަ ނުޖެހުމަށް މަގުފަހިވެ، ސަރައްހައްދީ އަދި ބައިނަލް އަގްވާމީ ސަލާމަތައް ނުރައްކާތެރިކަން އިތުރުވެގެންދާނެ ކަމެއް ކަމަށްވެސް ސައުދީ އަރަބިއްޔާ އިން ވަނީ ބުނެފައެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން އިޒްރޭލުން ފަލަސްތީނުގެ ޣައްޒާއަށް ހަމަލާތައް ދެމުން އަންނައިރު، އެ ހަމަލާތަކުގަިއ މިހާތަނަށް 37,834 މީހުން ވަނީ ޝަހީދުކޮށްލައިފައެވެ. އޭގެތެރޭގައި ގިނައީ އަންހެނުންނާ ކުޑަކުދިންކަމަށް ޣައްޒާގެ ސިއްހީ ވުޒާރާއިން ބުނެއެވެ.