އިލެކްޓްރޯނިކް ކުނި މަދުކޮށް، ބޭނުންކުރާ މީހުންގެ ފަސޭހަކަން އިތުރުކުރުމުގެ ގޮތުން އިންޑިއާ ސަރުކާރުން އެ ގައުމުގައި ސްމާޓްފޯނާއި ޓެބްލެޓްގެ ޕްރައިމަރީ ޗާޖިން ޕޯޓްގެ ގޮތުގައި ޔޫއެސްބީ-ސީ ސްޓޭންޑަރައިޒް ކުރަން ނިންމާފައިވާ ކަން އިއުލާނުކޮށްފިއެވެ.

މި ގަވާއިދަށް އަމަލުކުރަން ފަށާނީ ފުރަތަމަ ހުށަހެޅުނު ސުންގަޑި ކަމަށްވާ 2025 ވަނަ އަހަރުގެ މާޗް މަހުގެ ވުރެ ތަންކޮޅެއް ފަހުން 2025 ވަނަ އަހަރުގެ ޖޫން މަހުގެ ތެރޭގައެވެ.

Ad
rt

މި ނިންމުމަކީ ޔޫރަޕިއަން ޔޫނިއަންގެ އެފަދަ މެންޑޭޓަކާ ދާދިއެއްގޮތަށް ތަބާވާ ނިންމުމެއް ކަމަށްވާއިރު، 2024 ވަނަ އަހަރު ނިމުމުގެ ކުރިން އެ އަށް ފުރިހަމައަށް އަމަލު ކުރާނެ ކަމަށް ބެލެވޭ އިންޑިއާގެ ބައެއް ޓެކް ނޫސްތަކުން ބުނެއެވެ.

އިންޑިއާގެ އާ ސިޔާސަތުގެ ދަށުން އެ ގައުމުގައި އަލަށް ވިއްކާ ހުރިހާ ސްމާޓްފޯނާއި ޓެބްލެޓްތަކުގައި ޔޫއެސްބީ-ސީ ޗާޖިން ޕޯޓްތައް ހުންނަން ޖެހެއެވެ.

މި އިނީޝިއޭޓިވްގެ މަގްސަދަކީ ޗާޖިން ސޮލިއުޝަންތައް ލުއިކޮށް، ދުނިޔޭގެ މިންގަނޑުތަކާ އިންޑިއާ އެއްގޮތް ކުރުމެވެ. މި ގަވައިދުގެ ސަބަބުން ގިނަ ޗާޖަރު ބާވަތްތައް ބޭނުންވުން ނައްތާލައި އީ-ވޭސްޓް ވަރަށް ބޮޑަށް މަދުވެގެންދާނެ ކަމަށް ބެލެވެ އެވެ.

އައިފޯން 15 ގެ ޕްރޮޕަރައިޓަރީ ލައިޓްނިން ކަނެކްޓަރުން ޔޫއެސްބީ-ސީ އަށް ބަދަލުވުމާ އެކު އެޕަލް ފަދަ ފާހަގަކޮށްލެވޭ ޓެކް ކުންފުނިތަކުން މިހާރު ވެސް ވަނީ މި ބަދަލުތަކަށް އަހުލުވެރިވާން ފަށައިފައެވެ.

މި ގަވައިދުގެ ފުރަތަމަ މަރުހަލާގައި ސްމާޓްފޯނާއި ޓެބްލެޓަށް އަލިއަޅުވާލާފައިވާއިރު، 2026 ވަނަ އަހަރުގެ ކުރިން ލެޕްޓޮޕް ހިމެނުމުގެ ވިސްނުން ގެންގުޅޭ ކަމަށް ބައެއް ރިޕޯޓްތައް ބުނެއެވެ. ނަމަވެސް އަސާސީ ފޯނާއި ވެއާބަލްސް އަދި ވަނީ މި ޝަރުތުތަކުން އިސްތިސްނާ ކޮށްފައެވެ.

މިއީ އިލެކްޓްރޯނިކްސް ރެގިއުލޭޝަންގެ ބައިނަލްއަގްވާމީ ޓްރެންޑްތަކާ އެއްގޮތްވާ ގޮތުގެ މަތިން އިންޑިއާގެ ޓެކް އިންފްރާސްޓްރަކްޗާ ޒަމާނީ ކޮށް ތިމާވެއްޓަށް ކުރާ ނޭދެވޭ އަސަރު ކުޑަކުރުމަށް އިންޑިއާއިން ކުރަމުންދާ މަސައްކަތަށް އެޅުނު މުހިންމު ފިޔަވަޅެކެވެ.