އުރީދޫ އެމް-ފައިސާ ޑިޖިޓަލް ޓްރެވަލް އިންޝުއަރެންސް ތައާރަފުކޮށްފި

އުރީދޫ އެމް-ފައިސާ ޑިޖިޓަލް ޓްރެވަލް އިންޝުއަރެންސް ތައާރަފުކޮށްފިއެވެ.

މިއީ އުރީދޫ މޯލްޑިވްސްއާއި އަމާނަ ތަކާފުލްއާ ގުޅިގެން ތައާރަފުކުރި އިންޝުއަރެންސް ޕެކޭޖެކެވެ. މި ޕެކޭޖު ތައްޔާރުކޮށްފައިވަނީ އެމް-ފައިސާ މެދުވެރިކޮށް ނެގޭ ގޮތަށް ކަމަށް އުރީދޫން ބުންޏެވެ.

އެމް-ފައިސާ ޓްރެވަލް އިންޝުއަރެންސަކީ ރާއްޖެއިން ބޭރަށް ދަތުރުކުރާ މީހުންނަށް ހާއްސަކޮށްގެން ފޯރުކޮށްދޭ ހިދުމަތެކެވެ. އެގޮތުން، ރާއްޖެއިން ބޭރަށް ކުރާ ދަތުރުގައި ދިމާވާ އެކިއެކި ހާދިސާތަކުން ލިބޭ މާލީ ގެއްލުންތަކަށް އެ ޕެކޭޖު މެދުވެރިކޮށް ބަދަލުދެވޭނެ ކަމަށް އުރީދޫން ބުންޏެވެ.

މި ޕެކޭޖުން ބަދަލު ފޯރުކޮށްދޭ ކަންކަމުގެ ތެރޭގައި ދަތުރުމަތީގައި ދިމާވި އެކްސިޑެންޓެއްގައި ނިޔާވުން ނުވަތަ ދާއިމީ ނުކުޅެދުންތެރިކަން ކުރިމަތިވެއްޖެނަމަ 771،000 ރުފިޔާއާ ހަމައަށް ބަދަލު ފޯރުކޮށްދެވޭނެ ކަމަށް ވެސް އެ ކުންފުނިން ބުންޏެވެ. އަދި ކުއްލި ހާލަތްތަކުގައި (އެކްސިޑެންޓް އަދި އެމަޖެންސީ ހާލަތުގައި) ބޭސް ފަރުވާގެ ހަރަދުތައް 1،542،000 ރުފިޔާއާ ހަމައަށް ބަދަލު ފޯރުކޮށްދޭނެއެވެ.

ރާއްޖެއިން ބޭރަށް ކުރާ ދަތުރު ކެންސަލް ކުރަން ޖެހިއްޖެނަމަ ނުވަތަ ދަތުރު ކުރުކޮށްލާފައި އަންނަ ޖެހިއްޖެ ހާލަތެއްގައި ވެސް ޕެކޭޖު މެދުވެރިކޮށް ބަދަލު ފޯރުކޮށްދޭނެ ކަމަށް އުރީދޫން ބުންޏެވެ. ފްލައިޓަށް އެރުވި ދަބަސް ގެއްލުން ނުވަތަ ޕާސްޕޯޓް ގެއްލުންފަދަ ހާލަތްތަކުގައި ވެސް ބަދަލު ފޯރުކޮށްދޭނެ ކަމަށެވެ. އަދި ފުރަން އޮތް ފްލައިޓަށް ދިމާވި ކަމެއްގެ ސަބަބުން ދަތުރު ކުރެވޭގޮތް ނުވުން ނުވަތަ ފުރަން އޮތް ފްލައިޓް ފުރުން 12 ގަޑިއިރަށް ވުރެ ލަސްވެއްޖެ ނަމަ ބަދަލުދެވޭ އުސޫލުތަކެއް ހިމެނިފައިވާނެ ކަމަށް ވެސް އުރީދޫން ބުންޏެވެ.

އެމް-ފައިސާ ޓްރެވަލް އިންޝުއަރެންސް ޕެކޭޖު، 14 ދުވަހުގެ މުއްދަތަކަށް ނުވަތަ 35 ދުވަހުގެ މުއްދަތަކަށް ކަސްޓަމަރުންނަށް ނެގިދާނެ ކަމަށް އުރީދޫން ބުންޏެވެ. މި ޕެކޭޖުގައި އޭޝިއާ ބައްރުގެ ގައުމުތަކަށް ދަތުރު ކުރުމަށް ހާއްސަ އެންމެ އަގުހެޔޮ އޭޝިއާ ޕެކޭޖު ލިބެން ހުންނާނެ ކަމަށާއި އެމެރިކާ ނުވަތަ ކެނެޑާއަށް ދަތުރުކުރާ މީހުންނަށް ހާއްސަ ޕެކޭޖުތަކެއް ހުންނާނެ ކަމަށް ވެސް ބުންޏެވެ.

“އެމް-ފައިސާ ޓްރެވަލް އިންޝުއަރެންސަކީ މިވަގުތު މާކެޓްގައި ލިބެން ހުރި އެންމެ އަގުހެޔޮ ޓްރެވަލް އިންޝުއަރެންސް ޕެކޭޖުކަން އުފަލާއެކު ފާހަގަކުރަމެވެ. މި ޕެކޭޖުގެ އަގު މި ކަނޑައެޅިގެންދަނީ ނަންގަވާ މުއްދަތަކަށާއި ދަތުރު ކުރައްވާ ގައުމަކަށެވެ. މިގޮތުން އޭޝިއާ ބައްރުގެ ގައުމަކަށް 14 ދުވަހުގެ މުއްދަތަކަށް ދަތުރު ކުރައްވާނަމަ ދައްކާލަން ޖެހިވަޑައިގަންނަވާނީ އެންމެ 117 ރުފިޔާ،" އުރީދޫއިން ބުންޏެވެ.

އެ ޕެކޭޖް 65 އަހަރުން ދަށުގެ ކޮންމެ މީހަކަށް ވެސް ނެގެން ހުންނާނެއެވެ. މި ޕެކޭޖު ނަގާއިރު އެއްކޮށް ދަތުރު ކުރާ މީހުން ވަކިވަކި ޕެކޭޖު ނެގުމުގެ ބަދަލުގައި އެއް ޕެކޭޖުގައި ހުރިހައި އެންމެނަށް ހިމެނުމުން ފަސޭހަވާނެ ކަމަށް އުރީދޫން ބުންޏެވެ.

ޕެކޭޖުން ބަދަލު ހޯދުމަށް، އެކްސިޑެންޓެއް ދިމާވުމުން ވީހާވެސް އަވަހަކަށް އަމާނާ ތަކަފުލްއާ ހިއްސާކޮށް، ހަރަދުވި ބިލްތައް ހުށަހެޅުމުން ބަދަލު ފޯރުކޮށްދެވޭނެ ކަމަށް އުރީދޫން ބުންޏެވެ. އިމެޖެންސީ ހާލަތުގައި ބޭސްފަރުވާގެ ކަންކަން ހަމަޖެއްސުމަށްޓަކައި އަމާނާ ތަކަފުލްގެ ތާޑްޕާޓީ އެޖެންޓުން އެހީތެރިކަން ފޯރުކޮށްދިނުމަށް އެކިއެކި ސަރަހައްދުތަކުގައި ތިބޭނެ ކަމަށް ޗެސް އެ ކުންފުނިން ބުންޏެވެ.