ރިޔާސީ އިންތިހާބުގެ ދެވަނަ ބުރުގައި ޕީޕީއެމް/ޕީއެންސީގެ ކެނޑިޑޭޓް ޑރ. މުޙައްމަދު މުއިއްޒުއަށް ތާއީދު ކުރުމަށް މޯލްޑިވްސް ނޭޝަނަލް ޕާޓީ (އެމްއެންޕީން) ނިންމައިފި އެވެ.

މިގޮތަށް ފާސްވީ އެޕާޓީގެ ކައުންސިލް ބައްދަލުވުމުގައި ނެގި ވޯޓުގައި 37 މެންބަރުން ވޯޓު ދެއްވައިގެންނެވެ. ވަކިކޮޅަކަށް ނޭރުމަށް ހަ މެންބަރަކު ވޯޓު ދެއްވިއެވެ.

Ad
rt

މިބައްދަލުވުން ކުރިއަށް ގެންގޮސްފައިވަނީ މި މަހުގެ 30 ގައި ބާއްވާ ރިޔާސީ އިންތިހާބުގެ ދެވަނަ ބުރުގައި ކޯލިޝަން ހަދާނެ ޕާޓީއަކާއި ގުޅޭގޮތުން މަޝްވަރާކުރުމަށެވެ.

އެޕާޓީން ވިދާޅުވީ، ކޯލިޝަން ހެދުމާއި ގުޅޭގޮތުން ފުޅާ ދާއިރާއެއްގައި މެމްބަރުން މިނިވަންކަމާއެކު ހިޔަލު ފާޅުކޮށް، މަޝްވަރާ ކޮށްފައިވާ ކަމަށެވެ. އަދި ގިނަ މެމްބަރުންގެ ހިޔާލުތަކަށް ބަލާއިރު، ޕީޕީއެމް، ޕީއެންސީ އާއެކު ކޯލިޝަން ހެދުމަށް ގިނަ މެމްބަރުންނަސް ފެންނަކަމަށް ހިޔާލުފާޅުކުރި ކަމަށެވެ.

އެހެންނަމަވެސް ކޯލިޝަން ހަދާނެ ޕާޓިއެއް ފައިނަލް ކުރާނީ އެކްޒެކެޓިވް ކޮމެޓީ މީޓިންގައި ކަަމަށްވެސް މަޢުލޫމާތު ދެއްވި އެވެ.

އިލެކްޝަންސް ކޮމިޝަނުން މިއަދު އިޢުލާން ކުރައްވާފައިވާ ވަގުތީ ނަތީޖާގައިވާ ގޮތުން ފުރަތަމަ ބުރުގައި 101635 ވޯޓާއެކު ކުރީގައި އުޅުއްވަނީ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ރިޔާސީ ކެންޑިޑޭޓް، މާލޭ ސިޓީގެ މޭޔަރު ޑރ. މުހައްމަދު މުއިއްޒެވެ. ދެވަނައިގައިވާ ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ރިޔާސީ ކެންޑިޑޭޓް، މިހާރުގެ ރައީސް އިބްރާހިމް މުހައްމަދު ސާލިހަށް ލިބިވަޑަގެންފައިވަނީ 86161 ވޯޓެވެ.

ދެން އެންމެގިނަ ވޯޓު ލިބިވަޑައިގަތީ ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބަށެވެ. އޭނާ އަށް 15839 ވޯޓު ލިބިވަޑައިގެންއިރު، އަމިއްލަގޮތުން ވާދަކުރެއްވި ކުރީގެ ހޯމް މިނިސްޓަރު އުމަރު ނަސީރު ވަނީ 6343 ވޯޓު ހޯއްދަވާފައެވެ. އަދި ޖުމްހޫރީ ޕާޓީގެ ކެންޑިޑޭޓް، މާމިގިލީ ދާއިރާގެ މެމްބަރު ގާސިމް އިބްރާހިމަށް 5460 ވޯޓު ލިބިވަޑައިގެންފައިވާއިރު، އަމިއްލަގޮތުން ވާދަކުރެއްވި އެމްއާރްއެމްގެ ރައީސް އަހްމަދު ފާރިސް މައުމޫނަށް 2979 ވޯޓު ލިބިވަޑައިގެންނެވިއެވެ.

މީގެ އިތުރުން މޯލްޑިވްސް ނެޝަނަލް ޕާޓީ (އެމްއެންޕީ) ގެ ކެންޑިޑޭޓް، ދަނގެތީ ދާއިރާގެ މެމްބަރު އަދި ކުރީގެ ދިފާއީ ވަޒީރު މުހައްމަދު ނާޒިމަށް 1907 ވޯޓު ލިބިވަޑައިގެންނެވިއިރު، އަމިއްލަގޮތުން ވާދަކުރެއްވި ހަސަން ޒަމީލަށް ލިބިލެއްވީ 327 ވޯޓެވެ.

އީސީގެ ވަގުތީ ނަތީޖާ ދައްކާގޮތުން ސައްހަ ވޯޓުގެ އަދަދަކީ 220651 އެވެ. އަދި 4835 ވޯޓު ވަނީ ބާތިލުވެފައެވެ.