ގދ. ފަރެސްމާތޮޑާ ގެ އާ އިންޖީނުގެއިން ރަސްމީކޮށް ހިދުމަތް ދޭން ފަށައިފިއެވެ.

އެ ރަށުގައި މިހާތަނަށް ހިދުމަތް ދެމުން އައީ 22 އަހަރުވަންދެން ހިންގަމުން އައި އިންޖީނުގެއިންނެވެ. ނަމަވެސް އެ އިންޖީނުގެ ހުއްޓާލައި މިހާރު ވަނީ އާ އިންޖީނުގެއަށް ހިދުމަތްތައް ބަދަލު ކޮށްފައެވެ.

Ad
rt

ފަރެސްމާތޮޑާގައި 22 އަހަރުވީ އިންޖީނުގެ ނިއްވާލައި، އަލަށް ޢިމާރާތްކުރެވުނު އިންޖީނުގެ ހުޅުއްވައިދެއްވީ ޕްލޭނިން މިނިސްޓަރު މުހައްމަދު އަސްލަމް އާއި ފެނަކައިގެ މެނޭޖިން ޑިރެކްޓަރު އަހުމަދު ސައީދު މުހައްމަދެވެ.

އާ އިންޖީނުގޭގައި 400 ކިލޮވޮޓް އާއި 600 އަދި 800 ކިލޮވޮޓްގެ ޖެންސެޓް ވަނީ ބަހައްޓާފައެވެ.

ފެނަކަ އިން ބުނީ އަލަށް އިމާރާތްކުރާ އިންޖީނުގެތަކުގައި ޒަމާނީ ފެންވަރުގެ އޮފީސް އިމާރާތަކާއި، ރައްކާތެރިކަމާ އެކު ތެޔޮ ރައްކާކުރެވޭނެ ތަނެއް ގާއިމުކޮށް، ރައްޔިތުންނަށް ލިބޭ ގެއްލުން ކުޑަކުރުމަށްޓަކައި އިންޖީނުގެތަކުން ދުން ބޭރުކުރުމަށް ދުންހޮޅި ނުވަތަ ޗިމްނީ ތަކެއް ހަދާފައިވާނެ ކަމަށެވެ.

އެގޮތުން އާ އިންޖީނުގެތައް ހުޅުވާއިރު ރަށްރަށުގެ ކަރަންޓް ނެޓްވޯކް ވެސް އަޕްގްރޭޑްކުރެވިގެންދާނެ ކަމަށް ފެނަކައިން މައުލޫމާތުދެ އެވެ. އަދި މޯލްޑިވްސް އެނާޖީ އޮތޯރިޓީގެ ގަވައިދުތަކާ އެއްގޮތްވާ ގޮތުގެ މަތިން 70 ޑެސިބެލް އަށް ވުރެ މަތިނުވާނެހެން ސައުންޓް އެޓެނުއޭޓަރު ފަދަ ޒަމާނީ ވަސީލަތްތަކުގެ އެހީގައި އިންޖީނުގެއިން އުފައްދާ އަޑު މަޑުވެގެންދާނެ ކަމަށްވެސް ފެނަކައިން މައުލޫމާތުދެ އެވެ.