މައިކްރޯސޮފްޓުން އެ ކުންފުނީގެ މަޝްހޫރު ނޯޓްޕެޑް އެޕްލިކޭޝަނަށް އައު އަޕްޑޭޓެއް ގެނެސް، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ލިޔުންތައް އުފެއްދޭ ފީޗަރެއް ތަޢާރަފުކޮށްފިއެވެ.
މި އައު ފީޗަރާއެކު، މައިކްރޯސޮފްޓް 365 ނުވަތަ ކޮޕައިލެޓް ޕްރޯ ސަބްސްކްރިޕްޝަން އޮންނަ ފަރާތްތަކަށް، ބޭނުންވާ މަޢުލޫމާތު ދިނުމުން އެއާ އެއްގޮތަށް ލިޔުންތައް އުފެއްދުމުގެ ފުރުސަތު ލިބިގެންދާނެއެވެ.
މި އަޕްޑޭޓާއެކު، ލިޔުމެއް ފެށުމަށް އުނދަގޫވާ ފަރާތްތަކަށް ވަރަށް ބޮޑު ލުޔެއް ލިބިގެންދާނެއެވެ. އަދި އުފައްދާ ލިޔުންތައް އިތުރަށް ރަނގަޅުކުރުމަށް އިތުރު އިރުޝާދުތައް ދިނުމުގެ ފުރުސަތުވެސް ލިބިގެންދާނެއެވެ. މީގެ ކުރިން ނޯޓްޕެޑްގައި ހުރި "ރީރައިޓް" ފީޗަރއާ ޚިލާފަށް، މި އައު ފީޗަރއަކީ އަލުން ލިޔުންތައް އުފެއްދުމަށް ބޭނުންކުރެވޭ ވަސީލަތެކެވެ.
މައިކްރޯސޮފްޓުން އައު ފީޗަރތައް ތަޢާރަފުކޮށްފައިވަނީ. ހަމައެކަނި ނޯޓްޕެޑަކަށް ނޫނެވެ. ޕެއިންޓް އެޕްލިކޭޝަނަށްވެސް އޭއައި ބޭނުންކޮށްގެން ސްޓިކަރތައް އުފެއްދުމުގެ ފީޗަރެއް އިތުރުކޮށްފައިވެއެވެ. އަދި މީގެ އިތުރުން، ފޮޓޯއެއްގެ ވަކި ބައެއް އިސޮލޭޓްކޮށް އެޑިޓްކުރެވޭ "އޮބްޖެކްޓް ސިލެކްޓް" ފީޗަރެއްވެސް ތަޢާރަފުކޮށްފައިވެއެވެ. ނަމަވެސް މި ދެ ފީޗަރ ލިބެން ހުންނާނީ ހަމައެކަނި ކޮޕައިލެޓް+ ޕީސީތަކުގައެވެ.
މި އައު އަޕްޑޭޓްތަކާއެކު، މައިކްރޯސޮފްޓުން އެ ކުންފުނީގެ އެޕްލިކޭޝަންތަކަށް ޒަމާނީ އޭއައި ޓެކްނޮލޮޖީ ތަޢާރަފުކުރުމުގެ މަސައްކަތް ކުރިއަށް ގެންދާކަން ފާހަގަކުރެވެއެވެ. މިއީ ބޭނުންކުރާ ފަރާތްތަކަށް އިތުރު ފަސޭހަތަކެއް ލިބިގެންދާނެ ކަމެއް ކަމަށް ޓެކްނޮލޮޖީ ދާއިރާގެ މާހިރުން ދެކެއެވެ.
ކިޔުންތެރިންގެ ފިނިއަށި 0 ޚިޔާލެއް ލިބިފައިވޭ!