އެމެރިކާގެ ކުރީގެ ރައީސް ޑޮނަލްޑް ޓްރަމްޕް، 2020 ވަނަ އަހަރުގެ ރިޔާސީ އިންތިޚާބުގެ ނަތީޖާއަށް ހުރަސްއެޅުމުގެ ތުހުމަތުގައި އޭނާގެ މައްޗަށް އުފުލާފައިވާ ކުށުގެ ދަޢުވާތަކަށް އިންކާރުކޮށްފިއެވެ.

ރިޕަބްލިކަން ޕާޓީގެ ރިޔާސީ ކެންޑިޑޭޓް ޓްރަމްޕްގެ ފަރާތުން އަންގާރަ ދުވަހު ކޯޓަށް ހުށަހެޅި ލިޔުމެއްގައި ބުނެފައިވަނީ، އެމައްސަލައިގެ އަޑުއެހުމަށް ހާޒިރުވުމަށް ލިބިފައިވާ ޙައްޤު ދޫކޮށްލާ ކަމަށެވެ. ވޮޝިންގްޓަންގައި ބޭއްވުނު ކޯޓު އަޑުއެހުމުގައި ޓްރަމްޕް ބައިވެރިއެއް ނުވެއެވެ. ނަމަވެސް އޭނާގެ ވަކީލުން އޭނާގެ ފަރާތުން ދަޢުވާތަކަށް އިންކާރުކޮށްފައިވެއެވެ.

Ad
rt

މިއީ އެމެރިކާގެ ސުޕްރީމް ކޯޓުން މި އަހަރުގެ ކުރީކޮޅު، 2021 ވަނަ އަހަރުގެ ޖެނުއަރީ 6 ވަނަ ދުވަހު އެމެރިކާގެ ކެޕިޓޯލްއަށް ހަމަލާދިނުމާ ގުޅިގެން އިންތިޚާބު ފުރޮޅާލުމުގެ ދަޢުވާތަކުން ޓްރަމްޕަށް ގިނަ އިމްތިޔާޒްތަކެއް ދިނުމަށްފަހު ބޭއްވުނު ފުރަތަމަ އަޑުއެހުމެވެ. ނަމަވެސް ސުޕްރީމް ކޯޓުގެ ނިންމުމުން ކެންޑިޑޭޓެއްގެ ހައިސިއްޔަތުން ޓްރަމްޕް އެދުނު އެއްވެސް އިމްތިޔާޒެއް ނުލިބެއެވެ.

ފާއިތުވި ހަފްތާގައި، އެމެރިކާގެ ސްޕެޝަލް ކައުންސެލް ޖެކް ސްމިތް ވަނީ ސުޕްރީމް ކޯޓުގެ ނިންމުމަށް ރިޢާޔަތްކޮށް، މައްސަލައިގެ ދާއިރާ ހަނިކޮށް، އިތުރު ދަޢުވާއެއް ހުށަހަޅާފައެވެ. އަދި ޓްރަމްޕްގެ މައްޗަށް އުފުލާފައިވާ ހަތަރު ދަޢުވާއެއްވެސް ދޫކޮށްނުލާ ކަމަށް ބުނެފައިވެއެވެ. ނަމަވެސް އިންތިޚާބުގައި މަކަރުހެދިކަމުގެ ދޮގު ތުހުމަތުތަކަށް ތާއީދު ހޯދުމަށް ޖަސްޓިސް ޑިޕާޓްމަންޓް ބޭނުންކުރަން މަސައްކަތްކުރިކަމުގެ ތުހުމަތުތައް ވަނީ އުނިކޮށްފައެވެ.