އެމްޑީޕީ ޗެއާޕާސަން ނައިބުގެ މަގާމަށް މެންބަރު އަހުމަދާއި އިބުރޭ

މޯލްޑިވިއަން ޑިމޮކްރަޓިކް ޕާޓީ (އެމްޑީޕީގެ) ގެ ޗެއާޕާސަން ނައިބު އިދާރީ އަދި މާލީގެ މަގާމަށް ދެ ބޭފުޅުން ކުރިމަތި ލައްވައިފިއެވެ.

މިއަދަށް ވަގުތު ހަމަވިއިރު މަގާމަށް ކުރިމަތިލާފައިވަނީ ދެ ބޭފުޅުން ކަމަށް އެމްޑީޕީން ބުނެފައިވެ އެވެ.

ޗެއަރޕާސަންގެ ނައިބު އިދާރީގެ މަގާމަށް ކުރިމަތިލެއްވީ، ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި އިބްރާހީމް ވަހީދު (އިބްރޭ) އެވެ. އަދި ޗެއަރޕާސަންގެ ނައިބު މާލީގެ މަގާމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަހްމަދު އަބްދުﷲ އެވެ.

އެމްޑީޕީގެ ޗެއާޕާސަން ނައިބު އިދާރީ އަދި މާލީގެ މަގާމަށް ކުރިމަތިލުމަށް ހުޅުވާލި ފުރުސަތު ހަމަވެފައިވަނީ މިއަދު 12:00 އަށެވެ.

މިހާރު ހިނގަމުންދާ ދައުރުގެ އެމްޑީޕީގެ ޗެއާރޕާސަންގެ ނައިބު އިދާރީ އަދި މާލީގެ މަޤާމުގެ މުއްދަތު 25 އޮކްޓޯބަރ 2022 ވާ އަންގާރަ ދުވަހަށް ހަމަވާނެއެވެ. މިވަގުތު ޗެއަރޕާސަންގެ ނައިބު މާލީގައި ހުންނެވީ އަހުމަދު އަބްދުﷲއެވެ. އަދި ޗެއަރޕާސަންގެ ނައިބު އިދާރީގެ މަގާމުގައި ހުންނެވީ ހުޅުމާލެ ދާއިރާގެ މަޖިލިސް މެންބަރު އަލީ ނިޔާޒެވެ.