ވޯލްޑް ކަޕްގެ ނޮކްއައުޓް ބުރުގައި އޮސްޓްރިއާ އަތުން 3-0 އިން ސްޕެއިން މޮޅުވި މެޗުގައި، އެ ޓީމުގެ ޒުވާން ތަރި ލަމީން ޔަމާލް ލަނޑެއް ނުޖެހި ނަމަވެސް އޭނާ ވަނީ މޮޅު ކުޅުމެއް ދައްކައި އިދިކޮޅު ޓީމަށް ބޮޑު ނުރައްކަލެއް ކުރިމަތިކޮށްފައެވެ.

އުމުރުން 18 އަހަރުގެ ވިންގަރު ދަނީ އަނިޔާއަށްފަހު އޭނާގެ އެންމެ މޮޅު ކުޅުމަށް އެނބުރި އައުމަށް މަސައްކަތް ކުރަމުންނެވެ.

Ad
rt

ސޯފައި ސްޓޭޑިއަމްގައި ކުޅުނު މި މެޗުގައި ޔަމާލް ވަނީ އޮސްޓްރިއާގެ ޑިފެންސް ފޫއަޅުވާލުމަށްފަހު ހަ ހަމަލާއެއް އުފައްދާފައެވެ.

"އަހަންނަށް ލަނޑެއް ނުޖެހުނު ނަމަވެސް، އަހަރެމެން ދެން އޮތް ބުރަށް ދަތުރުކުރުމުން ވަރަށް އުފާވޭ،" މެޗުގެ މޮޅު ކުޅުންތެރިޔާގެ މަގާމު ހޯދުމަށްފަހު ވާހަކަދައްކަމުން ޔަމާލް ބުނެފަވެއެވެ.

ޔަމާލް އޮސްޓްރިއާ މެޗުގައި ކުޅެނީ، ފޮޓޯ: ނިއުޔޯކް ޓައިމްސް/ގެޓީ އިމޭޖްސް

މީގެ ދެ މަސް ކުރިން ބާސެލޯނާގެ މެޗެއްގައި ހަމްސްޓްރިންގަށް ލިބުނު އަނިޔާއެއްގެ ސަބަބުން ޔަމާލަށް މި މުބާރާތް ގެއްލިދާނެ ކަމުގެ ބިރު އޮތެވެ. ނަމަވެސް އޭނާ މިހާރު ހުރީ ފުރިހަމަ ފިޓްނަސްގައެވެ.

"މަޑުމަޑުން އަހަރެންގެ އަސްލު ކުޅުން އެނބުރި އަންނަން ފަށައިފި. އަހަރެން މިހުރީ 100 އިންސައްތަ ތައްޔާރަށް،" ޔަމާލް ބުންޏެވެ.

އޭނާ ވަނީ މި މެޗުގެ 85 ވަނަ މިނެޓުގައި ބަދަލުކުރުމުގެ ކުރިން ލަނޑު ޖަހާނެ ރަނގަޅު ފުރުސަތުތަކެއް ހޯދާފައެވެ.

މެޗުގެ ފުރަތަމަ ހާފުގެ އިތުރު ވަގުތުގައި ޔަމާލް ފޮނުވާލި ހަމަލާއެއް އޮސްޓްރިއާގެ ކީޕަރު އެލެގްޒެންޑަރ ޝްލޭގަރ ދިފާއުކުރިއިރު، މެޗުގެ ފަހުކޮޅު އޭނާ ފޮނުވާލި ބޯޅައެއް އޮސްޓްރިއާގެ ކެޕްޓަން ޑޭވިޑް އަލަބާ ވަނީ ގޯލުގެ ރޮނގުމަތިން ސަލާމަތްކޮށްފައެވެ. އޮސްޓްރިއާގެ ކޯޗު ރަލްފް ރަންގްނިކް ބުނީ ޔަމާލަކީ އާދަޔާ ހިލާފު ހުނަރެއް ހުރި ކުޅުންތެރިއެއް ނަމަވެސް، އޭނާ ލަނޑު ޖެހިޔަނުދީ ހިފެހެއްޓުމުގައި އޮސްޓްރިއާގެ ޑިފެންޑަރުން ކާމިޔާބު ހޯދި ކަމަށެވެ.

ޔަމާލް އޮސްޓްރިއާ މެޗުގައި ކުޅެނީ، ފޮޓޯ: ރޮއިޓާސް

ޔަމާލްގެ ކާމިޔާބީ ފާހަގަކުރުމަށް އޭނާގެ އާއިލާވެސް ސްޓޭޑިއަމްގައި ތިއްބެވެ. އޭނާގެ ތިން އަހަރުގެ ކޮއްކޮ ކޭން، ސްޕެއިންގެ ދިދަ އޮޅައިގެން ހުރެ ޓީމުގެ ތިންވަނަ ލަނޑު ފާހަގަކުރި މަންޒަރު ފެނުނެވެ. ޔަމާލް ބުނީ އޭނާގެ މަންމައާއި ކޮއްކޮ ދެކެމުން އައި ހުވަފެންތައް ހަގީގަތަކަށް ވާތަން ފެނުމަކީ އޭނާއަށް ލިބޭ ވަރަށް ބޮޑު އުފަލެއް ކަމަށެވެ.

މި މެޗު ބަލަން 72,492 މީހުން ވަދެފައިވާއިރު، އޭގެ ތެރޭގައި މަޝްހޫރު އެކްޓަރުން ކަމަށްވާ ޕެނެލޮޕީ ކްރޫޒް އަދި ހާވިއޭ ބާޑެމް ހިމެނެއެވެ.